BOBONARU, 06 Fevereiru 2026 (TATOLI)-Autoridade Munisípiu Bobonaru prepara ona sirkulár ida hodi bandu ema fase karreta no motorizada iha estrada ninin, tanba perturba movimentu publiku no besik kanál irrigasaun, tanba fó efeitu negativu ba produsaun agrikola.
Liuhusi enkontru Konsellu Koordenasaun Munisipál Bobonaru prodús ona sirkulár ida hodi proíbe atividade ne’ebé la tuir regra.
“Sirkulár ne’e iha ona. Ne’e hanesan ezbosu ida, kuandu aprova ita sei implementa”, Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, dehan.
Notísia relevante: Governu alerta labele fakar óleu fo’er sulin ba natar iha Maliana
Natar-na’in iha Ramaskora, Bendito Jesus Maia, fiar katak autoridade sei implementa sirkulár ne’e iha tempu badak hodi regulariza aktividade ne’ebé perturba espasu públiku.
Nia preokupa tanba durante ne’e bee husi kanál irrigasaun balun kontamidadu ho óleu fo’er, gazolina no ai-morik komíku ne’ebé sulin tama fali ba natar-laran.
“Iha Ramaskora ne’e dezde irrigasaun ne’e halo, kuaze loroloron ema mak fase kareta iha ne’e. Autoridade lokál sira bandu tiha, maibé ema mai nafatin fase kareta, rinso-been ho óleu fo’er sira ne’e sulin tun hotu ba natar-laran, bele estraga hare no ai-han sira ne’ebé ami kuda. Dalaruma produsaun la sa’e ne’e bele mós fatór ida mak ne’e”, nia lamenta.
Tuir observasaun jornalista Tatoli, aleinde iha Ramaskora, iha tempu loraik motorista sira mós fase bis iha área Memu no parte Tunubibi nian.
Notísia relevante: SEA husu empreza ofisina sira labele soe óleu foer arbiru
Jornalista: Sergio da Cruz
Editora: Maria Auxiliadora
