BOBONARO, 11 novembru 2024 (TATOLI) – Governu liuhusi Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, akompaña ho Prezidente Autoridade Munisípiu Bobonaro, Alexandrino Pires, hamutuk ho ekipa konjunta segunda ne’e fó ona xamada ba na’in ba ofisina atu asegura óleu fo’er iha fatin própriu hodi labele fakar sulin tuir bee-dalan ba natar ne’ebé pertense iha postu administrativu Maliana Vila.
Nia parte simu informasaun no faktu hatudu iha ofisina ne’ebé forma husi diresaun merkadu Maliana ba to’o bairru Mugis nia ne’e, balu aproveita tempu kalan fakar subar óleu foer iha valeta laran.
Nune’e governu no autoridade munisípiu Bobonaro halo intervensaun tanba peskizadór internasionál sira halo peskiza no liu teste laboratóriu iha Japaun deteta katak rai ba natar iha Maliana barak mak kontaminadu ho óleu fo’er ne’ebé sulin husi ofisina no fatin fase karreta ho motorizada.
Governante ne’e afirma, bainhira na’in ba ofisina la kumpre hodi asegura óleu iha fatin própriu, nia parte sei foti medida rigorozu tanba aktu ne’e bele estraga ambiente inklui ema barak nia vida.
Notisía relevante: SEATOU sobu barraka no fahi-luhan iha merkadu Maliana Vila
“Ita hotu haree ho matan, óleu fo’er sulin iha valeta, ne’ebé ita-boot sira para ho ida-ne’e, sé la koopera, ha’u mai fali taka tiha lai bengkel, halo loos tiha lai mak ita loke fali, entaun ita Maliana oan tenke koopera hodi hadi’a ita-nia sidade, óleu sira-ne’e tau halo didi’ak, bolu ema sira-ne’ebé presiza mai foti ba,” nia hateten durante komversa ho na’in ba ofisina, Doping no Amigo iha Maliana.
Tuir deklarasaun hosi na’in ba ofisina hanesan Doping no Amigo-Timor Babalai justifika katak, durante ne’e sira sempre asegura óleu iha bidón mamuk no bainhira nakonu kontaktu kedas ba kompañia sira iha Dili mai foti lori ba fatin destinadu.
Enkuantu óleu sira-ne’ebé sulin ne’e restu ne’ebé udan lori hafoin rega ofisina laran.
Prezidente Autoridade Munisípiu Bobonaro, Alexandrino Pires, reforsa di’akliu prevene antes, nune’e ba futuru labele afeta ba rai nia bokur menus.
“Ita-nia rai natar ne’e kontaminadu ho botas ona, ne’e afeta husi fase karreta no óleu fo’er ne’ebé fakar ba valeta sira-ne’e. Sé ida-ne’e kontinua halo signifika katak ba futuru laiha esperansa ba munisípiu Bobonaro atu sai icon natar ba territóriu laran tomak, sé natar ne’e mak ladi’ak ona Bobonaro mak númeru 1 sobu fronteira, ne’e ilegál ona, sira lakohi mate hamlaha, hakarak ka lakohi tenke hakat ba sorin,” tenik nia.
Líder másimu munisípiu Bobonaro ne’e dehan atu kombate ema labele fakar óleu arbiru, nia parte orienta ekipa jestaun merkadu atu halo kontrola rútina ba ofisina iha Maliana Vila kada semana.
Notisía relevante: SEA husu empreza ofisina sira labele soe óleu foer arbiru
Jornalista: Sérgio da Cruz
Editór: Evaristo Soares Martins
