BOBONARO, 11 novembru 2024 (TATOLI) – Sekretáriu Estadu Asuntu Toponímia no Organizasaun Urbana (SETAOU), Germano Santa Brites, akompaña husi Prezidente Autoridade Munisípiu Bobonaro, Alexandrino Pires, hamutuk ho ekipa konjunta, segunda ne’e tún direita ba terrenu hodi halo operasaun konjunta ba negosiante iha merkadu sentrál Maliana Vila ne’ebé halo atividade negósiu la tuir regra no okupa espasu públiku.
Iha operasaun ne’e, ekipa konjunta aruma ka haloot sasán negosiante sira-nia ne’ebé fa’an iha li’ur hodi muda ba merkadu laran, sobu barraka ki’ik ne’ebé negosiante sira harii hodi halo atividade negósiu ikan iha Obor no gazolina-gazoel iha dalan-ninin inklui sobu fahi luhan tanba konsidera la ijieniku no fó impaktu ba kualidade bee-matan Mugis no saúde komunidade nia.
Alende ne’e SEATOU mós fó xamada ba na’in ba ofisina atu kontrola oleu fo’er sira-ne’ebé fakar estraga iha valeta laran no orienta negosiante xineza sira sobu sai varanda ne’ebé didin hanesan manu-luhan.
Sekretáriu Estadu Germano Santa Brites, hateten atividade ne’e realiza bazea ba pedidu husi autoridade munisípiu Bobonaro no keixa husi komunidade sira tanba lamenta ho aktu negosiante sira iha merkadu Maliana.
Nia dehan, antes ne’e ekipa SEATOU no autoridade munisípiu Bobonaro fó sai ona avizu ba negosiante sira, balu koopera, maibé barak liu la koopera ho governu atu hadi’a kapitál Maliana.
Notísia relevante: PR Horta kondena maka’as SEATOU halo atuasaun agresivu hasoru negosiánte ambulante
“Autoridade munisípiu presiza ita-nia ajuda, entaun SAETOU iha obrigasaun atu mai hamriik iha autoridade nia kotuk, hodi ajuda servisu ne’e hotu bele la’o ho di’ak, tanba ne’e mak ohin ita mai ho ekipa konjunta husi liña ministeriál sira ne’ebé iha munisípiu Bobonaro, apoia husi PNTL no F-FDTL ne’ebé akompaña servisu iha terrenu, nune’e ita ajuda hadia tiha lai ita-nia maluk sira ne’ebé fa’an sasán rungu-ranga la tuir buat-ne’ebé munisípiu fó-sai ba sira,” nia informa ba jornalista sira, iha terrenu.
Nia hatutan, asaun ne’ebé ekipa konjunta halo la’ós atu estraga, duni no baku, maibé atu hadi’ak ka organiza didi’ak atividade negósiu merkadu Maliana sai organizadu no moos, tanba negosiante barak la fa’an sasán iha fatin ne’ebé Governu prepara.
Nia parte fó ona orientasaun ba ekipa Diresaun Servisu Jestaun Merkadu Munisípiu Bobonaro atu kontinua halo kontrolu rútina.
“Laiha negosiante ida atu lakohi koopera ho Estadu ho Governu, ita hanesan populasaun ne’ebé di’ak, povu ne’ebé mak hadomi ninia munisípiu rasik ita tenke haka’as-aan koopera ho estadu ho Governu atubele hadi’ak ita-nia sidade, sé mak lakohi koopera ninia problema, ita sei foti sansaun prega multa,” nia hateten.
Prezidente Autoridade Munisípiu Bobonaro, Alexandrino Pires, agradese ba Sekretáriu Estadu Germano Santa Brites ho ekipa ne’ebé fó tempu atu mai organiza kapitál Maliana maske sei okupadu ho serbisu iha kapitál nasaun Dili.
“Fó mós atensaun mai iha munisípiu katak presiza hadi’ak mós iha munisípiu la’ós iha kapitál de’it, ida-ne’e sai valór ida boot tebes ba ha’u, tanba hadi’ak kapitál munisípiu Bobonaro ne’e importante tebes,” nia katak.
Pires rekoñese maske situasaun ida-ne’e halo negosiante sira balu kontente no balu triste, maibé obrigatóriu tenke hala’o serbisu tanba lei mak obriga atu halo mudansa ba sidade.
“Ita-nia inan sira-ne’ebé kontente tanba atu hadi’ak, balu ne’ebé triste tanba nia tomak tiha ho buat-ne’ebé sala, lakohi atu la’o ho di’ak, mas ita la’o nafatin tuir lei ne’ebé prega ba SEATOU, tanba mundansa importante, la’ós ba ita de’it, maibé ba ema hotu, ita hakarak lori dezenvolvimentu ba ema hotu no nasaun nia ba oin,” nia hateten.
Entretantu negosiante Natália de Jesus, sente triste tanba ekipa konjunta muda nia sasán ho asaun forsada.
“Ami prontu koopera ho Estadu, labele mai sobu estraga de’it hanesan, sasán sira-ne’e sosa ho osan, estraga hanesan ami lakon, lori saida mak ami atu selu ba banku, ami fa’an ne’e foti osan kréditu, ami mai fa’an iha li’ur ne’e, tanba governu la prepara fatin ida ba ami ida fa’an bua ho malus ne’e, sé fatin iha ami hakarak tama ba laran,” nia akresenta.
Tuir observasaun Jornalista TATOLI iha terrenu nota katak, iha atividade ne’e negosiante balu lakohi koopera no diskute malu ho ekipa konjunta to’o sasán inklui ai-fuan no liis, tomate fakar hotu tanba sira seidauk hetan espasu própriu atu halo negósiu bua ho malus no seluk tán.
Hafoin ne’e ekipa konjunta organiza no lori kedas negosiante bua ho malus ba okupa espasu ne’ebé mamuk hodi halo atividade negósiu kada loron.
Notisía relevante: Ekipa SEATOU muda vendedór iha Tasi-Tolu ba Merkadu Menleuana
Jornalista: Sérgio da Cruz
Editór: Evaristo Soares Martins
