DILI, 05 jullu 2022 (TATOLI)—Sekretáriu Estadu Ambiente (SEA), Demétrio do Amaral de Carvalho, husu ba empreza ka individuu sira ne’ebé loke ofisina (bengkel) iha territóriu laran tomak, labele fakar arbiru óleu foer iha estrada ka valeta laran tanba liga ba ambiente, óleu bele estraga estabilidade ekolojia no ekosistema.
“Ita hatene katak óleu foer ne’e kontein materiál kímika hanesan karbon sira inklui mós metál pezadu, entaun nia tama iha bee ka ekosistema naturál ida, nia bele tama iha kadeia ai-han no bele hela metin iha rede ai-han sira ne’e, ne’ebé ikus mai bele filafali ba ita bainhira konsumu hahán, entaun ida-ne’e ligasaun ho saúde públiku ne’e impaktu tebes,” Sekretáriu Estadu hateten ba Agência Tatoli, iha ninia knaar fatin, Bebora, tersa ne’e.
Notísia relevante: SEA konsidera komemorasaun loron internasionál ambiente importante halo reflesaun
SEA rasik daudaun ne’e halo serbisu maka’as ho entidade lubuk ida, espesiálmente ba estasaun eletrisidade rua iha Betabo no Hera, ne’ebé halo produsaun óleu foer kada fulan-ida ka rua bele prodús to’o litru 100.000.
“Ida-ne’e ami rekolla tutuir, daudaun ne’e konjela hela iha ita-nia Sentru Halibur óleu foer iha Tibar, ne’ebé ense ho tanke kapasidade litru 600.000, daudaun besik nakonu ona, entaun ita sei kontrui tan sistema ida atu fó solusaun maibé solusaun di’ak liu mak ita hetan empreza ida ho kualidade atubele halo resiklajen,” nia akresenta.
Nia dehan, empreza ka pesoál sira ne’ebé bainhira soe óleu foer arbiru ne’e sei hetan sansaun tanba iha lei hateten katak ema ida ka empreza soe óleo foer arbiru, bele tama iha krime ambientál.
“Ita iha lei kódigu penál krime ambientál artigu 215-221, tanba ne’e bainhira la halo tuir regra ne’ebé iha, tempu ita uza lei tama iha krime ambientál bele resposabiliza iha Tribunál no iha pena prizaun ne’e bele to’o tinan-tolu no tinan-lima,” nia tenik.
Sekretáriu Estadu dehan, kona-ba pena prizaun ne’e sansaun la hanesan, ba empreza singulár ne’ebé soe óleu foer bele hetan pena hahú hosi tinan-tolu, maibé ba empreza koletivu, pena prizaun todan liu pena tinan-tolu.
Jornalista : Arminda Fonseca
Editora : Julia Chatarina
