BOBONARU, 04 Jullu 2025 (TATOLI)—Komunidade sira solisita Autoridade Munisipíu Bobonaru, hamutuk ho diresaun kompetente atu halo operasaun ba animál liuliu asu ne’ebé husik livre iha espasu publik atu preve tranzmisaun virus raiva.
Abitante Maliana, Vidal de Jesús Talo hateten Munisípiu Bobonaru dadaun ne’e sai fatin risku ba tranzmisaun virus referidu.
“Ami haree atividade operasaun ne’e la’o tiha ona iha Dili no Vikeke. Agora ita Bobonaru ne’e bainhira? Hein to’o ema mate barak mak atu halo ka halo oinsá? Tanba asu iha Bobonaru laran ne’e barak mak pozitivu raiva,” nia informa ba Tatoli iha Merkadu Maliana, sesta ne’e.
Notisia Relevante: Raiva hamate ema, Governu hasai sirkulár labele husik Asu la’o livre
Nune’e mós, abitante Maliana, Filomena de Jesus reforsa katak Autoridade Munisipíu presiza tau-atensaun ba kestaun ne’e ho séria tanba moras ne’e fó-ameasa ba saúde públika.
“Agora ita Bobonaru mós ema mate tanba rabies (raiva) ne’e iha ona, depois asu mós tata ema loron-loron de’it. Se husik livre hanesan ne’e, ita-nia Autoridade Munisípiu Bobonaru presiza halo asaun ruma tanba asu sira-ne’e balun na’in laiha no balu na’in finje la liga. Ida hanesan ne’e mak perigu. Ami hanesan inan-aman ta’uk liu mak ami nia-oan ki’ik sira bá eskola ne’e mak asu tata oinsá,” nia kestiona.
Antes ne’e, Koordenadór Autoridade Munisípiu Bobonaru, Celestino Marques deklara ekipa sira iha ona terrenu halo advokasia saúde ba komunidade kona-ba medida preventiva sira no husu atu sulan animál no simu vasina.
Tuir dadus ne’ebé TATOLI asesu husi Departamentu Vijilánsia Epidemiolojia Diresaun Servisu Saúde Autoridade Munisípiu, rejista katak hahú husi Janeiru to’o loron 24 Juñu tinan ne’e, kazu asu tata ema sa’e bá 169 kompostu husi mane 102 no feto 67. Husi númeru ne’e, óbitu rua.
Jornalista: Sergio da Cruz
Editór: Xisto Freitas Piedade
