KOVALIMA, 12 Juñu 2026 (TATOLI)- Autoridade Munisípiu Kovalima liuhusi Komisaun Jestaun Dezastre, Munisípiu (KJDM) kompostu husi Servisu Munisipál Jestaun Risku Dezastre Naturál, Autoridade Protesaun Sivíl no Cruz Vermela Timor-Leste (CVTL), fó apoia nesesidade bázika ba vítima afetadu dezastre naturál ba uma-kain 26, iha Suku Beco-Suai no Suku Lour, Zumalai, Kovalima.
“Ami husi ekipa KJDM mak tuun direita atu responde ba kualker situasaun dezastre naturál ho tipu emerjénsia, bazeia ba rezultadu asesmentu ami identifika uma-kain 26 bazeia ba regra hafoin halo asesmentu ami tenke reponde kedas tanba situasaun udan iha fatin-fatin kuaze reponde iha postu administrativu hotu entaun la konsege fó apoia emerjénsia”, Diretór Servisu Munisipál Jestaun Risku Dezastre Naturál, João Martins, hato’o ba Jornalista sira,iha Beco.
Apoia emerjénsia ne’e mak hanesan foos ho marka globos kilograma 26 kada uma-kain ida hetan saka ida, Mina-Tein bimoli litru rua ida, sardina lata 10, basia ida, roupa hamutuk ho pakote komplementar sira seluk.
Ekipa KJDM foin mak fó apoia emerjénsia ba vítima dezastre naturál ho tipu inundasaun iha suku Beco, tanba iha aldeia Illa, suku Belekasak afetadu erozaun grave. Ekipa KJDM fó apoiu emerjénsia bazeia ba kbiit husi Governu no la’os fó apoiu ba tempu naruk, maibé atu responde de’it situasaun balun.
Iha fatin hanesan, Xefe Suku Beco, Arlindo Vernardino Lemos, dehan Autoridade Kovalima liuhusi KJDM fó apoia emerjénsia bazeia ba ekipa sira halo asesmentu dadus tuir kondisaun dezastre naturál.
“KJDM fó apoia nesesidade bázika bazea ba ekipamentu asesmentu halo asesu ba dadus sasan ne’ebé mak fó apoiu la signifika la’os atu selu ita-boot sira-nia sasan maibé hodi hakmaan ba ita boot hodi aguenta atu han”, nia reforsa.
Jornalista:Celestina Teles
Editór:Florencio Miranda Ximenes
