DILI, 09 Juñu 2026 (TATOLI)-Governu Timor-Leste espresa nia solidariedade profunda ba Governu no povu Filipina hafoin akontese rai-nakdoko ho magnitude 7,8 iha illa Mindanao, iha loron segundu (08/06).
Iha akontesimentu ne’e kauza kauza vítima mortál, kanek, estragu signifikativu ba infraestrutura, no evakuasaun populasaun sira tanba risku ba tsunami.
Tuir dokumentu ne’ebé Tatoli asesu, iha tempu susar boot ida-ne’e, Timor-Leste hato’o sentidu kondolénsia kle’an ba família vítima sira no dezeja rekuperasaun lalais ba sira ne’ebé kanek.
Governu Timor-Leste akompaña hela situasaun ne’ebé evolui ho preokupasaun no rekoñese serbisu husi autoridade Filipina sira, serbisu emerjénsia sira, no ekipa salvamentu sira ne’ebé mobilizadu hodi tulun komunidade ne’ebé afetada.
Rai-nakdoko ne’e rasik halo edifísiu sira monu, eletrisidade mate, no alerta kona-ba tsunami iha zona tasi-ibun oioin iha Filipina no nasaun sira seluk iha rejiaun.
Autoridade sira kontinua avalia estensaun husi estragu sira no koordena operasaun sira resposta no rekuperasaun nian.
Ministru Prezidénsia Konsellu Ministru no Portavós Governu, Agio Pereira, afirma katak “iha momentu ida-ne’e tristeza ba povu Filipina, Timor-Leste hato’o nia solidariedade ba Filipina ne’ebé belun no parseiru kle;ur ona iha ASEAN nia laran. Ami hato’o kondolénsia ba família vítima sira no dezeja rekuperasaun lalais ba komunidade ne’ebé hetan kanek iha trajédia ne’e”, hateten.
Tuir Ajénsia Notisioza Filipina nian, númeru vítima mortál aumenta husi na’in-haat, ne’ebé rejista iha loron dahuluk husi fenómenu naturál, ba na’in-37 iha loron-tersa ne’e, enkuantu ema na’in-haat kontinua lakon no 144 hetan kanek iha sekuénsia rai-nakdoko nian.
Autoridade filipinu sira seidauk fó sai avaliasaun ofisiál ida kona-ba danus sira ne’ebé akontese husi katástrofe ne’e.
Jornalista: Arminda Fonseca
Editora: Maria Auxiliadora
