DILI, 15 Juñu 2026 (TATOLI)—Diretór Jerál Servisu Nasionál Ambulánsia Emerjénsia no Médikamentu, Simplicio Amaral, informa iha tempu badak Empreza Timor Safary sei hatama karreta ambulánsia mai Timor-Leste.
“Posbilidade Empreza Timor Safary ne’ebé mak manán konkursu públiku husi Servisu Nasionál Ambulánsia Emerjénsia no Médikamentu sei lori ka hatama Ambulánsia tolu no karreta trend ida mai Timor-Leste no sei la to’o fulan Setembru. Kona-ba karreta ambulánsia tolu ho karreta trend ida-ne’e, daudaun ne’e iha preparasaun nia laran. Posbilidade la to’o fulan-Setembru, Empreza bele hatama ona mai Timor-Leste,” Simplicio Amaral dehan ba jornalista sira iha HNGV, ohin.
SNAEM, I.P simu ona estiker ho naran Ambulansia husi empreza, tanba sira konfirma ho SNAEM, I.P para naran ho estiker ne’e loos ona mak empreza bele hatama karreta mai Timor tanba la to’o Setembru ambulánsia tolu bele tama mai ona ho karreta trend ida.
“Ambulansia tolu ne’ebé mak dadaun ne’e Servisu Nasionál Ambulánsia Emerjénsia no Médikamentu, I.P sosa sei distribui ba Munisípiu tolu hanesan Manufahi, Manatutu ho Bobonaru, tanba sira ne’e ambulansia ida de’it, no orsamentu ba sosá karreta haat ne’e hamutuk $300 mill dólar,”Nia haktuir.
Nia esplika, Servisu Nasionál Ambulánsia Emerjénsia no Médikamentu sei selu fazeadamente maibé banhira kareta ambulansia ne’e mak tama mai iha Timor-Leste halo ona pagamentu hotu ona ba empreza.
“Bainhira ambulánsia sira hatama mai, ita bele halo ona pagamentu. Tanba empreza hatama karreta mai ne’e empreza ne’ebé iha ona sertikadu ba karreta Toyota nian. Tanba empreza atu hatama karreta ne’e sira mós iha esperiénsia di’ak, tanba sosa ambulansia ne’e la’o tuir planu ne’ebé mak SNAEM, I.P iha,” nia afirma.
Nia dehan, ambulánsia ne’ebé mak foin daudaun xoke karau ida iha Munisípiu Baukau, Postu Administrativu Laga nian, agora tékniku sira husi SAEM. I.P nian halo hela manutensaun kuaze tama ona 60%, tanba ambulánsia avaria ne’e la fó ba empreza sira mak halo manutensaun.
“Maibé mekaniku sira iha SNAEM, I.P nian mak halo manutensaun ba ambulánsia ne’e, halo manutensaun de’it iha SNAEM, I.P nia gastu la boot ida, tanba ita-nia ema rasik mak halo manutensaun ne’ebé purvolta rihun $2l,” nia dehan.
Tanba ne’e, Servisu Nasionál Ambulánsia Emerjénsia no Médikamentu, I.P sei garante katak ambulánsia ne’e sei funsionamentu di’ak maibé daudaun ne’e halo manutensaun.
“Karik entrega ba empreza sira mak halo manutensaun ne’e bele to’o rihun $5. Tanba ne’e banhira manutensaun hotu sei entrega fali ambulánsia ne’e ba Servisu Saúde Munisípiu Lautein, tanba ekipamentu halo manutensaun husi SNAEM, I.P nian rasik, la’ós empreza,” nia dehan.
Tanba ne’e, ekipa investigasaun husi Departamentu Kontrola Kualidade husi Servisu Nasionál Ambulánsia Emerjénsia no Médikamentu, I.P sei halo investigasaun ba motorista ne’ebé mak lori karreta ambulánsia refere.
“Ekipa investigasaun husi Departamentu Kontrola Kualidade husi Servisu Nasionál Ambulánsia Emerjénsia no Médikamentu, I.P sei servisu hodi husu tuir kazu akontesimentu ba motorista lori ambulansia ne’e. Tanba, ambulánsia iha nia kritériu kazu grave halai maka’as no kazu la grave halai neineik, depois mak halo hotu mak ita ko’alia fali,” nia dehan.
Jornalista : Felicidade Ximenes
Editór : Cancio Ximenes
