BAUKAU, 02 Maiu 2026 (TATOLI)—Autoridade Munisipál Baukau (AMB) liuhusi enkontru Konsellu Koordenasaun Territoriál (KTT) propoin orsamentu jerál Estadu (OJE) liuhusi Planu Asaun Anuál ba tinan-2027 ho montante hamutuk $31.558.1526.
Sekretáriu Munisipál Asuntu Administrasaun no Finansa Baukau, Juvinal Daniel Filipe, esplika estrutura AMB lideradu Prezidente Autoridade Munisipál partisipa reuniaun KTT aprezenta ezbosu orsamentu ho montante hirak-ne’e nu’udár parte proposta atu Governu liuhusi Ministériu Administrasaun Estatál (MAE) halo analiza antes simu envelope fiskál tinan-2027.
“Ita prepara PAA nu’udár ezbosu ho montante $31.558.1526 ba tinan oin,” Juvinal Filipe informa ba TATOLI iha ninia kna’ar fatin, Vila Antiga, Tersa ne’e.
Juvinal Filipe relata husi montante orsamentu hirak-ne’e aloka ba kategoria lima hanesan saláriu no vensimentu ho montante millaun $4-resin, kapitál dezenvolvimentu millaun $14.7, kapitál menór millaun $1.8, transferénsia públika hamutuk millaun $8.8 no bens no servisu millaun $1.9.
Aleinde ne’e, husi kapitál dezenvolvimentu aloka ba Programa Dezenvolvimentu Integradu Munisipál (PDIM) hamutuk projetu 66 ne’ebé aprova liuhusi reuniaun Konsellu Koordenasaun Munisipál (KKM), enkuantu lista projetu liuhusi kategoria transferénsia públika hamutuk projetu 64 ba atividade regulár Programa Nasionál Dezenvolvimentu Suku (PNDS).
“Ita sempre hatama ho montane boot maibé dalabarak depoiz Komisaun Revizaun Orsamentál (KRO) mak bele konvense nune’e bele konsidera,” Juvinal tenik.
AMB liuhusi KTT aprezenta mós lista projetu liuhusi fundu infraestrutura ne’ebé kategoriza emerjénsia hamutuk projetu 31 ne’ebé presiza Governu sentrál fó prioridade tanba orsamentu liu millaun $500 fora husi kompeténsia munisípiu.
AMB rasik simu rekomendasaun husi MAE hanesan asina kontratu interministeriál hanesan Ministériu Obra Públika (MOP), Ministériu Agrikultura, Pekuária, Peska no Floresta (MAPPF), Ministériu Solidariedade Sosiál no Inkluzaun (MSSI), kona-ba fornesimentu dadus hodi sinkroniza iha portál munisipál no Balkaun Úniku.
Seluk, husu AMB atu envolve ona Ministériu Transporte no Komunikasaun no Ministériu Juventude, Desportu, Arte no Kultura (MJDAK ) nu’udár serbisu munisipál iha Baukau no presiza mellora di’ak liután Programa Merendár Eskolár liuliu hasa’e produtu lokál.
Entretantu, Reuniaun Konsellu Koordenasaun Territoriál rasik hala’o durante loron-rua (26-28 Maiu) lideradu Ministériu Administrasaun Estatál (MAE ) ne’ebé aleinde Prezidente Autoridade Munisipál, partisipa mós husi Primeiru-Ministru, Xanana Gusmão iha Areia Branka, Metiaut, Dili.
Jornalista: Natalino Belo
Editór: Xisto Freitas da Piedade
