BAUKAU, 09 Jullu 2026 (TATOLI)—Autoridade Postu administrativu Baguia hahú simu apoiu kombustivel ne’ebé kontribui husi Autoridade Munisipál Baukau (AMB) hodi normaliza pasadeira Basarwai iha Suku Haekoni.
Administradór Postu Administrativu Baguia, Mário Xavier da Silva, esplika apoia ne’ebé simu atu utiliza ba transporte hodi transporta materiál fatuk no rai hodi normaliza ba estrada ne’ebé kotu iha área Basarwai, Suku Haekoni tanba fó impaktu ba movimentasaun transporte ba suku tolu hanesan Haekoni, Osso-Huna no Afaloikai.
“Ita husu iha bidón tolu ne’ebé mak fornese husi autoridade atu lori bá. Karik la to’o komunidade sira sei aumenta,” Mário hateten iha Vila Nova, Baukau, Kinta ne’e.
Mário relata apoiu ne’e bazeia ba propostu husi xefe suku na’in-tolu liuhusi enkontru konjunta iha foin lalais ne’e.
Notísia relevante: Autoridade suku tolu deside konjunta normaliza estrada Basarwai
Líder Baguia-oan ne’e hateten sira nafatin loke odamatan hodi simu apoia hotu tantu indivíduu no grupu sira-ne’ebé iha inisiativa atu fó tanba konsideradu ajuda hakmaan serbisu iha terrenu.
Mário konsidera estrada diresaun referida presiza hadi’a tanba durante hetan estragu iha fulan-Maiu difikulta movimentasaun transporte públiku no fó impaktu ba folin nesesidade bázika sa’e no difikulta situasaun emerjénsia hanesan transportamoras ruma no inan-isin-rua ba ospitál.
“Ho normalizasaun estrada iha-ne’ebá bele garante ona transporte públiku no privadu la’o normál fali,” Mário da Costa akresenta.
Entretantu, AMB apoiu kombustivel gazoel barríl tolu ho totál litru 474 ne’ebé sei oferese ba kompañia Rivio Constraction nu’udár Baguia oan tanba voluntáriu kontribui hodi normaliza pasadeira Basarwai iha Haekoni.
Jornalista: Natalino Belo
Editór: Xisto Freitas da Piedade
