DILI, 09 Jullu 2026 (TATOLI) – Prezidente Dalimak Repúblika Indonézia, Megawati Soekarnoputri, propoin atu hametin kooperasaun entre partidu polítiku sira iha Indonézia no Timor-Leste, nu’udar dalan ida atu fortalese demokrasia no aprofunda relasaun entre nasaun rua ne’e.
Megawati hato’o proposta ne’e durante palestra prezidensiál iha Dili ho títulu “Nasaun rua tesi aspirasaun kompartida: Harii Nasaun, Rekonsiliasaun, no Fraternidade iha Sudeste Aziátiku nu’udar Dalan ba Sivilizasaun Mundiál”.
Tuir Megawati, polítika la’ós de’it kona-ba podér, maibé nu’udar instrumentu. “Ha’u sempre hateten katak envolve iha polítika la’ós de’it kestaun ida kona-ba podér. Ninia signifikadu kle’an liu, polítika mak atu defende povu nia moris no nasaun nia futuru”, Megawati dehan.
Nia esplika katak Partai Demokrasi Indonesia Perjuangan (PDI-P), ne’ebé nia lidera, harii nu’udar instrumentu luta povu nian. Hodi refere ba hanorin sira husi Sukarno, Megawati hateten katak partidu tenke sai hanesan pilár ida husi Estadu, ho povu sai fonte forsa prinsipál.
Megawati hatutan, PDI-P iha intensaun atu harii amizade ho partidu polítiku sira iha Timor-Leste, liuhusi programa konjuntu oioin, inklui formasaun ba lideransa.
“Ami iha intensaun atu harii amizade entre partidu ne’e ho partidu polítiku sira iha Timor-Leste, ezemplu liuhusi formasaun lideransa konjunta”’ nia hateten.
Hodi hatutan katak kooperasaun ne’e bele inklui dezenvolvimentu lideransa estratéjiku, hametin instituisaun partidu nian, no hametin ideolojia hanesan baze ba objetivu no diresaun organizasaun polítika nian.
Megawati fiar katak dezenvolvimentu lideransa ne’ebé forte sei hametin demokrasia no garante katak amizade entre Indonézia no Timor-Leste sei buras nafatin iha futuru.
Notísia relevante: Xanana konsidera Megawati referénsia rekonsiliasaun, umanidade no lideransa
Jornalista: Arminda Fonseca
Editora: Maria Auxiliadora
