DILI, 30 jullu 2024 (TATOLI) – Diretora Canossa Magalhães Training Center (CMTC), Madre Sonia Sangel akompaña husi Madre Guilhermina Marçal, FdCC, hasoru-malu ho Primeiru-Ministru (PM), Kay Rala Xanana Gusmão, hodi husu apoia orsamentu atu fasilita formasaun kulinária ba foin-sa’e sira iha Ataúro.
Madre Guilhermina Marçal hateten, CMTC iha programa di’ak tebtebes atu hasa’e kapasidade Ataúro-oan iha área kulinária maibé presiza tebes orsamentu.
“Ami presiza apoia ruma husi Governu, programa ne’e ami hahú tiha ona iha tinan 2018, maibé bainhira mosu pandemia Covid-19 entaun paradu tiha, nune’e mak ami mai ko’alia fali ho Primeiru-Ministru atu bele fó apoiu fali,” Madre Guilhermina Marçal hateten ba jornalista sira iha Palásiu Governu, tersa ne’e
CMTC hakarak hadi’a kualidade edukasaun no hakbiit abilidade joven sira iha Ataúro nu’udár fatin potensiál turístiku iha Timor-Leste, no fiar katak Primeiru-Ministru sei konsidera pedidu ida-ne’e.
CMTC ninia edifísiu sentrál iha Bidau Lecidere ho formasaun oioin bá joven sira mak hanesan Lían Inglés, Portugés, komputadór, keyboard, guitar, administrasaun, formasaun lideransa no seluk tán.
Jornalista: Hortencio Sanchez
Editór: Florencio Miranda Ximenes
