DILI, 17 outubru 2022 (TATOLI) — Ministru Administrasaun Estatal, Miguel Pereira, hateten iha 2023, Fundu Espesiál ba Dezenvolvimentu Ataúro (FEDA) tau prioridade ba projetu infaraestrutura hanesan reabilitasasun aeroportu, portu, saneamentu, eletrisidade, ponte, estrada no seluk tan.
“Liuhosi ita-nia enkontru ohin ne’e, ha’u informa ba Primeiru-Ministru katak reuniaun tuir mai sei aprova ba projetu infraestrutura sira ne’ebé atu implementa iha Ataúro mak estrada, ponte, bee-moos, saneamentu, eletrisidade, portu mariña iha tasi ibun atu turista sira bele atraka no aeroportu”, Miguel Pereira, hateten, iha Rezidénsia PM, Farol.
Kona-ba konstrusaun portu, Primeiru-Ministru, Taur Matan Ruak, husu Ministériu Administrasaun Estatal liuhosi Fundu Espesiál ba Dezenvolvimentu Ataúro atu koordena ho JICA tanba sira iha ona estudu kona-ba konstrusaun portu iha Ataúro.
“Kona-ba eletrisidade, ami membru konsellu administrasaun FEDA halo kolaborasaun mós ho KOICA tanba sira mós iha projetu ida ohin loron atu estabelese mak monta enerjia renovável iha Ataúro”, revela.
Rekorda katak iha tinan 2022, Parlamentu Nasionál aprova orsamentu hamutuk milliaun $13 ba FEDA utiliza hodi halo investimentu projetu infraestrutura sira iha Ataúro ho nia karatér sósiu ekonómiku.
Jornalista : Arminda Fonseca
Editór : Zezito Silva
