DILI, 12 abríl 2023 (TATOLI)—Diretór Luta Hamutuk, José Alves da Costa, hateten fraternidade uman ne’e hodi bele reforsa líder polítika sira tenke hatudu pás no estabilidade iha ámbitu kampañia ba eleisaun lejislativa nian.
“Atividade ohin, fraternidade umana ida-ne’e sai tebes hodi reforsa fila-fali ita-nia espiritu maun-alin timoroan tenke hatudu pás no estabilidade, hodi nune’e ita bele aselera fila-fali ita-nia prosesu dezenbolvimentu ne’e,” nia dehan ba jornalsita sira, hafoin partisipa iha konferénsia nasionál ho tema “A Fraternidade Humano Como Factor Essencial para a Consolidação da Páz e da Estabilidade Democrativa”, iha salaun Laline Larigutu, Colmera, kuarta ne’e.
Tanba ne’e, nia dehan, Prezidente Repúblika no oradór sira mós ohin ko’alia katak durante iha eleisaun sei halo buat barak, to’o lees manu-aten no buat hotu la’o di’ak maibé ikus kuandu sa’e ona palku haree ema barak ona komesa manas hodi insulta malu no ataka malu.
“Hosi insulta malu ne’e vítima mak sé. Vítima mak ita-nia eletór sira, ita-nia povu sira no ita-nia joven sira. Tanba ne’e dala barak ita ko’alia ona partidu barak mak diferensa maibé objetivu ne’e ida de’it atu lori moris di’ak ba povu ida-ne’e. Maibé tenke konsidera malu, iha kampañia ida-ne’e no tenke sukat liafuan no tetu liafuan atu nune’e labele provoka hodi hamosu estabilidade,” nia dehan.
Entretantu, iha ámbitu kampañia ne’e, iha loron 21 sei mosu solar eklipse iha Timor-Leste nune’e presiza halo sensibilizasaun makaas atu nune’e ema ida-idak bele entende konsekuénsia atu nune’e bele prevene ninia-an.
Importante mak tenke halo sensibilizasaun maibé husu liu-liu ba mídia sira tenke foka beibeik ba ida-ne’e para bele sensibiliza ba sidadaun sira oinsá bele hadok-an hosi impaktu negativu sira.
“Sensibilizasaun ne’e importante publikasaun hosi mídia ne‘e importante oinsá sensibiliza ema. Bainhira mosu fulan taka loromatan karik ha’u bele hateke ba ema hotu. Ha’u hanoin buat ne’e mós sei présiza osan no komprimísiu balun hosi kompañia, karik dala ruma ne’e ladún importante,” nia dehan.
Jornalista : Osória Marques
Editór : Cancio Ximenes
