DILI, 29 agostu 2024 (TATOLI)– Vise- Primeiru-Ministru Malázia, Dato Seri Ahmad Zahid Hamidi, agradese ba Estadu Timor-Leste ne’ebé oferese ona rai metru kuadradu 6.000 ba Malázia hodi hari’i Embaixada iha Timor-Leste.
“Ami ko’alia ona kona-ba aspetu kooperasaun oioin, kona-ba relasaun bilaterál entre Timor-Leste no Malázia. Ami hato’o ami nia agradesimentu ba Governu Timor-Leste ne’ebé fornese ona rai metru kuadradu 6.000 ba Governu Malázia hodi harii edifísiu Embaixada Malázia iha Dili,” Vise-Primeiru-Ministru Malázia hateten ba jornalista sira iha Palásiu Governu hafoin enkontru ho Primeiru-Mimistru Kay Rala Xanana Gusmão, kinta ne’e.
Nia dehan, relasaun Malázia ho Timor-Leste di’ak tebes no ba futuru Governu Malázia hakarak apoiu dezenvolvimentu Rekursu Umanu iha Timor-Leste.
Durante enkontru parte rua ko’alia mós kona-ba komérsiu no investimentu iha ne’ebé Malázia prontu atu fó apoiu másimu hodi hamutuk ho Timor-Leste iha Organizasaun Mundiál Komérsiu (OMK) no hein katak sei fasilita Timor-Leste atu habelar nia negósiu komérsiu iha mundu tomak.
Nia subliña, Malázia, liuhusi Universidade Kuala Lumpur, fó ona bolsa estudu hamutuk 50 ba estudante sira hosi Timor-Leste hodi kontinua sira-nia estudu iha nível mestradu no doutoramentu nu’udar parte ida hodi hasa’e kapasidade no edukasaun.
“Malázia prontu atu ajuda Timor-Leste. Ita ko’alia mós kona-ba kapasitasaun no edukasaun. Ami oferese fatin 50 ba estudante sira husi Timor-Leste hodi estuda Mestradu no PhD iha Universidade Kuala Lumpur,” nia tenik.
Nia dehan tan, “Ami oferese formasaun ba Edukasaun no Formasaun Téknika no Profisionál ne’ebé iha Malázia iha Institutu TVET hamutuk 1345 no ami oferese ida ne’e ba estudante sira husi Timor-Leste.”
Dezenvolve setór turizmu
Atu avansa setór turizmu, nia hein iha temlu besik bele halo diskusaun ho Ministériu Transporte no Komunikasaun (MTK) iha Timor-Leste hodi reativa fila-fali voo Kuala Lumpu- Dili atu bele hasa’e númeru turista mai nasaun ne’e.
“Malázia mós apoia maka’as Timor-Leste atu sai membru plenu ASEAN nian, no ami sei ajuda Timor-Leste hodi prienxe rekizitu sira hodi fasilita adezaun nu’udar membru plenu ASEAN nian, oinsa ita bele dezenvolve hamutuk Timor-Leste nia área truzmu sira hodi tulun nasaun ne’e nia ekonómia,” nia hakotu.
Jornalista: Hortencio Sanchez
Editór: Florencio Miranda Ximenes
