MALIANA, 06 jullu 2023 (TATOLI)-Ministériu Obra Públika (MOP) iha tempu badak sei halo normalizasaun ba estra kotu iha área Zulo-il, suku Lontas liga ba postu administrativu Lolotoe, munisípiu Bobonaro hodi fasilita movimentasaun transporte públiku.
Diretór Servisu Munisipál Obra Públika, Munisípiu Bobonaro, António Mahana, hato’o ona relatóriu ba parte diresaun estrada MOP niam.
Notísia relevante: Implementasaun UKL suku rua iha Balibo no Lolotoe atraza
“Ita hotu hein rezultadu, horisehik ha’u rasik iha-ne’ebá ko’alia ho sira atu mai halo atendimentu ho mákina pezadu, ne’ebé ita hotu hein tempu badak sei bele mai atende,” nia ko’alia iha edifísiu administrasaun munisipál Bobonaro, kinta ne’e.
Amandio Perreira nu’udar abitante, sente kontente rona novidade ne’e no espera katak sei rezolve duni kondisaun estrada refere.
“Ami-nia estrada ne’e ohin ha’u mai, motorizada ema dudu de’it, tanba monu hotu ona, karreta liu la di’ak, agora sira hosi Loloto’e mai ne’e liu fali Gildapil ba Atus, kona Saburai mak tún mai Maliana, ne’e ami husu Governu hadi’a lalais,” nia husu.
Estrada refere kondisaun grave hafoin akontese udan foin lalais ne’e hodi rezulta rai monu no halai hotu.
Tuir dadus postu administrativu Lolotoe iha aldeia 20, suku hitu, ho totál populasaun 7,695, komposta hosi mane 3,813 no feto 3,882 ho totál uma-kain 1,591.
Jornalista: Sérgio da Cruz
Editór: Evaristo Soares Martins
