DILI, 03 Dezembru 2025 (TATOLI)–Tribunál Judisiál Primeira Instánsia Dili (TJPID), Kuarta ne’e, liuhusi Juiza Julmira Auxiladora hatún despaisu hodi aplika medida koasaun Prizaun Preventiva ba arguidu VAC tanba halakon Xefe aldeia Metir, Miguel Correia dos Santos nia vida inklui baku nia kaben Agusta ho kondisaun grave to’o bebe iha kabun laran hakotu iis, iha Suku Fatumasi, Postu Administrativu Bazartete, Munisípiu Likisá, iha loron Sábadu (29/11).
Iha prosesu interrogatóriu dahuluk ne’e, Ministériu Públiku (MP) liuhusi Prokuradór Domingos Barreto promove krime rua ba arguidu mak hanesan omesídiu agravadu ne’ebé iha artigu 139 husi Kódigu Penál no Krime Arma Branka ne’ebé previstu lei númeru 5/2017 Lei Arma Branka no Prátika Arma Branka no Arte Marsiál no Arte Rituál.
Iha alegasaun, MP Prokuradór Domingos Barreto solita ba Tribunál atu aplika medida koasaun ne’ebé todan hanesan Prizaun Preventiva, tanba arguidu nia aktu priense krime tuir artigu 183 husi Kódigu Prosesu Penál Timor-Leste.
Iha sala julgamentu, iha alegasaun Defeza husi Arguidu VOC, Advogadu Privadu Angelmo Pinto Akara hateten, nia parte aseita ho alegasaun MP tanba nia asistidu (arguidu VOC) nia aktu ne’e priense elementu krime ne’ebé previstu iha artigu 183 tanba oho ema na’in-tolu.
Hafoin Tribunál rona tiha parte hotu, Tribunál hasai despaisu hodi aplika Prizaun Preventiva.
Hafoin alegasaun, Defensór Públiku, Angelmo Pinto Akara hateten, razaun Tribunál aplika Prizaun Preventiva tanba kuandu arguidu livre iha li’ur arguidu bele iha perigu de fuga, katak bele iha poténsia arguidu bele halai sees husi kazu ne’e no nia bele kontinua halo fali atividade kriminozu no perturbasaun, tanba ne’e defeza mos konkorda.
Notísia relevante : PNTL detein ona supeitu halakon Xefe Aldeia Miguel Correia dos Santos nia vida
Defeza haree katak arguidu sofre hela moras mentál, tanba ne’e maka iha audiénsia nia laran arguidu konfesa ba nia aktu ne’ebé nia halo, maibé parte judisiál la atende saida mak arguidu deklara.
“Arguidu sofre hela moras mentál, tanba ne’e maka iha audiénsia nia laran arguidu konfesa, maibé saida maka arguidu deklara Tribunál, Ministériu Públiku, no Defeza la entende, tanba husu buat ida nia hatan fali oin seluk,” nia katak.
Angelmo hateten, durante iha interrogatóriu dahuluk, arguidu deklara ba Tribunál katak nia baku arguidu ho besi kanu.
Audiénsia julgamentu ne’e prezide husi Juiza Zulmira Auxiladora, MP reprezenta husi Prokurador Domingos Barreto, arguidu hetan asisténsia legál husi Defensór Públiku Angelmo Pinto Akara.
Jornalista : Natalino Costa
Editora : Julia Chatarina
