DILI, 01 Dezembru 2025 (TATOLI)—Polísia Nasionál Timor-Leste (PNTL) Komandu PNTL Likisá serbisu hamutuk ho komunidade Likisá kaptura ona suspeitu ho inisiál VAC ne’ebé deskonfia halakon Xefe Aldeia Metir, Miguel Correia dos Santos nia vida.
Kazu amesídiu agravadu ne’e akontese iha Suku Fatumasi, Aldeia Metir, Postu Bazartete, Munisípiu Likisá, iha Sábadu (29/11) maizumenus tuku 04:30 madrugada. Miguel Correia hetan oho husi ema deskoñesidu iha nia uma bainhira nia toba hela iha hadak leten.
Hafoin akontesimentu kazu ne’e, Polísia Eskudra Bazartete hamutuk ho komunidade lokál halo kedan asaun hodi asegura evidénsia no halibur informasaun liga ho krime ne’e.
Aleinde ne’e, halo koordenasaun ho líder lokál no komunidade atu halo prosesu verifikasaun no identifikasaun klaru, hafoin sesaun investigasaun kime, halo kedan atuasaun imediatu hodi inisia prosesu investigasaun kriminál.
Portavós PNTL Superintidente, Polísia João Belo dos Reis relata, bazeia ba dadus inisiál ne’ebé PNTL rekolla, motivu provável ne’e tanba mai husi amante, tanba suspeitu deskonfia ninia kaben iha relasaun domin ho Xefe Aldeia nia alin mane.
“Bainhira akontese kazu ne’e, suspeitu ho inisiál VAC halai husi fatin akontesimentu no horiseik iha loron Domingu (30/11) iha oras 13:30, liuhusi Operasaun Konjunta ne’ebé hala’o husi Komandu hamutuk ho komunidade kaptura suspeitu iha baliza entre suku Fahilebo no Fatubesi iha ai-laran tuan. Suspeitu agora iha sela detensaun Komandu PNTL Likisá no orsida lorokraik husi Komandu Munisípiu Likisá husi Sesaun Investigasaun Kriminál Komandu Munisípiu Likisá bá Ministeriu Públiku,” João Belo informa ba Jornalista sira iha Komandu Jerál PNTL Kaikoli, Segunda ne’e.
Notísia relevante : Suspeitu ba kazu omesídiu Kulau entrega aan ba PNTL
Nia dehan, kazu ne’e iha hela prosesu investigasaun, nune’e bainhira iha dezenvolvimentu informasaun mak sei hato’o fali ba públiku.
“Tuir identifikasaun inisiál, suspeitu baku ho besi kanu, baku iha parte saida ne’e prosesu investigsaun sei la’o hela, karik iha dezenvolvimentu informasaun, iha informasaun foun ruma ligasaun ba kazu ne’e ami sei hato’o ba mídia,” nia akresenta.
Maski nune’e, husi parte Polísia lakohi hakle’an suspeitu baku vítima nia parte saida to’o hakotu iis, tanba ne’e hanesan parte husi segredu justisa.
Momentu ne’ebá vítima toba hela iha hadak leten iha nia uma mak suspeitu ba baku nia.
“Suspeitu baku ho besi kanu, tuir investigsaun ne’ebé Sesaun Investigasaun halo ba suspeitu, nia deklara katak nia baku ho besi kanu ba vítima Miguel dos Santos to’o rezulta hakotu vida. Suspeitu baku iha ne’e segredu justisa ami labele fó sai,” nia informa.
Liután molok suspitu ba baku matebian, nia mós halo ofensa ba nia kaben hodi rezulta nia kaben ho naran Agusta, ne’ebé ho kondisaun grávida baku to’o nia kaben ne’e daudaun halo hela tratamentu iha ospitál.
Belo dehan, ho asaun ofensa ne’e, suspeitu VAC nia kaben agora iha hela ICU Ospitál Nasionál no nia oan iha kabun laran mate.
“Suspeitu nia ferik oan ho kondisaun grávida ne’e, tuir informasaun ne’ebé ita rekolla orseik, bainhira iha operasaun labarik iha nia kabun laran mate. Ida-ne’e mós sei iha krime ketak,” nia katak.
Ho kazu ne’e, Sesaun Investigasaun kriminál Komandu PNTL Likisá rejista ho krime númeru NUC 0104/2025 Likisa.
Daudaun ne’e husi Forénsiku Nasionál hodi Komandu PNTL Likisá halo hela autopsia ba matebian nia isin, karik husu apoiu ba Diresaun Nasionál Servisu Investigsaun Kriminál prontu apoiu.
Portavós PNTL agradese ba komunidade Likisá ne’ebé kolabora ho Polísia hodi ajuda fornese informasaun nune’e bele kaptura suspeitu ba kazu ne’e.
“Ba oin PNTL apela atu koordena nafatin ho Polísia no kontinua atualiza informasaun ligasaun ba kazu. Ami mós husu ba ita hotu atu rezolve problema ida ho ulun malirin, ho dalan komunikasaun ne’ebé adekuadu liu,” nia katak.
Jornalista : Natalino Costa
Editora : Julia Chatarina
