DILI, 21 marsu 2023 (TATOLI) – Komandante Polísia Nasionál Timor-Leste (PNTL), Superintendente Xefe Natercia Martins, informa suspeitu prinsipál ne’ebé envolve iha kazu omesídiu Kulau entrega aan ona ba polísia.
“Sim, supeitu dezde horseik kedan halai mai iha polísia hodi entrega aan. Nia sei iha área Díli laran, nia seidauk sai hosi Díli”, Natercia Martins hateten ba jornalista sira iha Sentru Formasaun Polísia (CFP, sigla portugés), tersa ne’e.
Nia dehan, laiha fatin ba suspeitu sira atu subar aan tanba esforsu Polísia Eskudra Cristo Rei inklui Servisu Informasaun Polísia (SIP) liuhosi servisu hamutuk ho komunidade buka tuir supeitu sira ne’ebé envolve iha kazu omesídiu ne’e, to’o ikus laiha dalan ba supeitu atu subar no obrigatóriu tenke aprezenta nia aan.
“Hafoin akontesimentu kazu omesídiu ne’e menus hosi oras 24 nia-laran ita-nia polísia hamutuk ho komunidade buka tuir kedan supeitu ba kazu ne’e no sira sente laiha liberdade tanba ne’e sira fó aan ba komunidade polísia hodi submete ba iha prosesu”, nia informa.
Natercia esplika, motivu hosi kazu omesídiu Kulau, ne’e kauza hosi problema partikulár entre mane no feto to’o ikus rezulta sona vítima hodi hakotu nia vida iha fatin akontesimentu.
Tanba ne’e, Komandante PNTL Munisípiu Dili klarifika kazu ne’e la’os relasaun ho Grupu Arte Marsiál (GAM) maibé hanesan individu balun ne’ebé lansa iha rede sosiál katak kazu Kulau ne’e motivu hosi GAM.
“Maibé ha’u hakarak atu hateten ba públiku katak problema ne’e problema partikulár entre feto ho mane, depois mak sai tiha ba krime, estraga ema ninian vida no mós rezulta ema balun to’o kanek grave”, nia dehan.
Iha biban ne’e, Natercia Martins, relata hosi kazu omesídiu Kulau PNTL detein ona supeitu nain ualu.
“Iha Supeitu nain ualu mak ita detein ona iha sela polísia entre suspeitu hirak ne’e iha mane nain hitu feto nain ida”, nia salienta.
Supeitu sira ne’e agora daudaun detein ona iha sela Komandu PNTL Munisipiu Dili hodi kumpre oras 72 molok submete ba interogatóriu dahuluk iha Tribunál Distritál Dili.
“Suspeitu sira-nia auto notísia, agora duadaun ita prepara hela no ita sei submete ba Ministériu Públiku hodi suspeita sira bele submete ba interogatoriu dahuluk iha Tribunál”, nia adianta.
Notísia relevante : http://HNGV hein mandadu husi MP atu halo autopsia ba kazu omesídiu iha Kulau
Jornalista: Natalino Costa
Editór : Zezito Silva
