BAUCAU, 28 fevereiru 2023 (TATOLI) – Munisípiu Baucau liuhosi Servisu Munisipál Saúde to’o loron ikus atinje tuir tarjetu durante implementasaun programa kampaña nasionál integradu imunizasaun rútina.
Diretór Servisu Munisipál Saúde, Domingos Reinaldo da Costa Guterres, esplika, maske nune’e maibé parte munisípiu sei kontinua implementa tanba hola parte ona iha programa saúde públika iha kada sentru no postu saúde hotu.
“Ita haree komunidade balun seidauk vasina nune’e ita kontinua hala’o nafatin,” Diretór Servisu Munisipál Saúde Baucau hateten iha Vila Antiga, tersa ne’e.
Saúde Baucau rekoñese iha komunidade balun seidauk lori oan ba fatin vasinasaun tanba hasoru difikuldade hanesan klima inklui kondisaun estrada aat liuliu iha área rurál iha postu administrativu sira.
Hosi totál sentru saúde hamutuk 9 komposta hosi Uailili, Baguia, Bucoli, Laga, Quelicai, Venilale, Vemasse, Tirilolo no Ossoqueli ne’ebé akumuladu hosi vasina OPV hamutuk pursentu 111.1 hosi tótal tarjetu hamutuk 14.943.
PCV pursentu 109,7 hosi totál alvu hamutuk 14.459, sarampu rubela (MR) pursentu 103,1 hosi totál tarjetu hamutuk 13.030, vitamina A pursentu 111,7 hosi totál tarjetu hamutuk 13.593 no abendazol 107,6 hosi totál tarjetu hamutuk 12.622.
Antes ne’e, MS fó-sai tarjetu ba iha munisípiu Baucau labarik idade tinan zero to’o 5 hamutuk 12.500 hosi totál nível nasionál purvolta rihun 180-resin.
Nune’e tuir dadus ne’ebé relata iha tabela nível nasionál munisípiu Aileu mak okupa kobertura dahuluk, tuir kedas Ainaro no Atauro hafoin munisípiu Baucau iha númeru dahaat hosi totál munisípiu 13 inklui Rejiaun Admistrativa Espesiál Oecuse-Ambeno (RAEOA).
Programa kampaña nasionál integradu imunizasaun rútina hahú lansa iha loron-12 fulan-janeiru no termina iha loron-28 fulan-fevereiru ne’ebé komposta hosi introdusaun vasina PCV, vitamina A, ai-moruk kontra lumbringa (MR) ne’ebé hetan apoia hosi Organizasaun Munidiál Saúde (OMS), UNICEF, USAID no DIFAT.
Obejetivu hosi vasina refere atu proteje saúde timor-oan hotu hosi ameasa moras oinoin tuir meta dezenvolvimemtu sustentável katak fó atensaun ba área hotu-hotu inklui saúde.
Jornalista : Natalino Belo
Editór : Evaristo Saores Martins
