DILI, 06 Jullu 2026 (TATOLI)—Diretór Ezekutivu Sentru Nasionál Chega! (CNC-sigla portugeza), Hugo Maria Fernandes, informa ezisténsia Ajénsia Notisioza TATOLI, I.P. ba da-X (27 Jullu 2016-27 Jullu 2026) to’o agora seidauk hatudu nia alvu loloos iha Estadu no Governu ida-ne’e.
Nia haktuir TATOLI ho idade tinan sanulu (10) ona maibé nafatin halo notísia hanesan ho órgaun komunikasaun sosiál sira seluk (nakonu ho notísia seremoniál, ladún imposta dadus) no lentu, tan ne’e difísil tebes atu sai referénsia ba mídia sira seluk atu halo tuir.
Nia fundamenta Ajénsia TATOLI tenke define nia ba alvu mak saida, nia vizaun mak saida, sá mak nia kna’ar hodi promove Estadu Timor-Leste ne’e bá-oin.
“Dahuluk TATOLI nafatin iha situasaun ne’ebé krítiku maibé nia tenke iha porsaun ida barak liu promove Estadu ho Governu nia polítika sira ba oin. Ida-ne’e sai alvu ida. Daruak, nia (TATOLI) tenke aliña notísia tuir prioridade Estadu no Governu nian iha kada tinan. Tenke fó-sai notísia ho porsaun ne’ebé boot hanesan setór ekonomia, asuntu ASEAN ida-ne’ebé boot mak TATOLI sai ajente ida atu fó notísia barak liu ba ida-ne’e,” nia dehan ba TATOLI iha Fatuhada, Dili, Segunda ne’e.
Tuir nia, tanba ema iha Austrália, Filipina ka iha rai ne’ebé de’it bele asesu ka hakarak hatene kona-ba Timor-Leste, sei bele asesu TATOLI sira ka bele lee notísia iha TATOLI, entaun TATOLI tenke projeta ba rejiaun ne’e, projeta ba mundu no atu projeta ida-ne’e, nia tenke hatene Estadu ho Governu nia prioridade mak saida. Ida-ne’e mak foin bele dehan TATOLI fó-sai duni notísia Estadu nian.
Hugo hatutan TATOLI tenke sai mikrofone Estadu nian ba ema atu liu, tanba ema sempre hatete ema kuandu halo desizaun ne’e, notísia TATOLI tulun ema atu halo desizaun.
Husu kona-ba durante ne’e TATOLI sai alvu ba Estadu no Governu, eis jornalista ne’e esplika, “Ha’u la haree. Frankamente ha’u la haree TATOLI halo kna’ar ida-ne’e. Nune’e, TATOLI tenke re-define nia alvu iha rejiaun Timor-Leste”.
Nune’e, Diretór CNC ne’e apela ba TATOLI katak kontinua sai Ajénsia Notisioza TATOLI ba Estadu no Governu ida-ne’e.
“Parabéns TATOLI. Ha’u-nia mensajen importante mak TATOLI tenke sai duni Ajénsia Notisioza Estadu nian. Ne’e signifika define didi’ak nia alvu saida mak tenke halo para depoiz sai Ajénsia Notisioza Estadu nian ne’ebé bele lori duni vizaun polítika Estadu nian. Ida-ne’e mak importante,” Hugo subliña.
Jornalista: Osória Marques
Editór: Xisto Freitas da Piedade
