BOBONARO, 25 jullu 2022 (TATOLI) – Hahú hosi fulan-janeiru to’o jullu tinan 2022, Provedoria Direitu Humanu no Justisa (PDHJ), delegasaun territoriál Maliana, munisípiu Bobonaro, simu keixa boa governasaun no violasaun direitu umanu 18.
Diretór PDHJ Delegasaun Territoriál Bobonaro, Domingos Pinto Tavares, informa keixa hasoru funsionariu públiku tanba abandona serbisu, barak liu,komete hosi ajente polísia tanba halo tratamentu kruél hasoru komunidade, balu hasai gravasaun subar filmajen bainhira joven sira namora malu publika fali iha mídia sosiál,no balu komete kazu ‘amante’.
PDHJ Delegasaun Territoriál Maliana ninia área jurizdisaun ne’e kobre munisípiu tolu mak hanesan, Munisípiu Covalima, Ermera no Bobonaro, maibé provizóriu seidauk simu keixa ruma hosi munisípiu Ermera.
Notísia relevante: PDHJ Bobonaro rejista keixa boa governasaun-violasaun direitu umanu hitu
“Ita simu keixa ho tipu violasaun direitu umanu no boa governasaun hamutuk 18 ne’e mai hosi munisípiu Covalima rua, Bobonaro 16, Ermera laiha ho razaun tanba área jeografikamente sira besik liu Dili,” nia imforma ba jornalista sira iha Maliana, segunda ne’e.
Hosi totál keixa 18 ne’e tipu kazu violasaun direitus umanu hamutuk neen no 11 violasaun boa governasaun no keisa ida mak komunidade sira dada hikas fali.
“Parte PNTL ho Alfándega halo apreensaun tanba konsidera sasán sira-ne’e laiha lisensa, kontra bandu, maibe bainhira vítima sira-ne’e hato’o keisa, fila-fali ba vítima sira rezolve família, entaun kesar-na’in sira mai dada fila-fali, ita tempu ne’ebá ami seidauk aprezenta ba Dili,” nia esklarese.
Keisa hirak-ne’e subemte ona ba diresaun asisténsia públika nasionál no daudaun ne’e entrega ona karta notifikasaun dahuluk ba kesar-na’in-17, no hosi númeru ne’e na’in-15 mak hetan ona notifikasaun segundu hodi kotinua ba prosesu mediasaun no investigasaun, falta rua mak seidauk.
Domingos fundamenta, prosesu ba keixa ne’e iha oin tolu, ida sei lori ba Komisaun Jestaun Kesar (KJK) atu deside estatutu hosi kazu ne’e, ne’ebé envolve ema na’in-tolu mak hanesan provedora direitu umanu no nia aduntu na’in-rua ida foka ba asuntu boa governasaun no direitu umanu mak iha kompeténsia deside katak keixa hirak-ne’e konsidera sai kazu ka lae.
“Sé kesar ne’e mak sai kazu ne’e katak kesar ne’e sei lori ba prosesu investigasaun ka prosesu mediasaun no konsiliasaun, maibé sé keixa ne’e la sai kazu entaun kesar ne’e la tama iha mandadu provedoria nian entaun Komisaun Jestaun Kesar sei deside taka no haruka fali ba instituisaun relevante,” nia heteten.
Relasiona ho kazu violasaun direitus umanu no boa governasaun ne’ebé kontinua rejista kada tinan, ba oin PDHJ Maliana sei esforsu halo sesiblizasaun ba funsionáriu públiku, ajente polísia, komunidade no estudante sira nune’e bele minimiza kazu hirak-ne’e.
Notísia relevante: PDHJ Bobonaro identifika funsionáriu edukasaun na’in-10 partisipa iha kampaña eleitorál
Jornalista : Sérgio da Cruz
Editór : Evaristo Soares Martins
