BAUCAU, 16 marsu 2022 (TATOLI) – Sekretariadu Tékniku Administrasaun Eleitorál (STAE) Munisípiu Baucau finaliza ona prosesu pakotementu materiál eleisaun prezidensiál.
Diretór STAE Munisípiu Baucau, Lúcio Freitas Salvador, esplika, pakotementu materiál sensitivu no la’ós-sensitivu ba sentru votasaun 125 no estasaun votu 150 iha Baucau finaliza ona iha loron tersa ne’e, kontinua fahe kabina votu nune’e prosesu tomak remata ona no hein loron sesta 18 marsu transporta ba postu administrativu sira.
“Materiál sira aseguradu tanba seguransa PNTL na’in-rua ho arma inkluidu ita-nia funsionáriu sira asegura,” Diretór STAE Baucau informa ba Agência Tatoli iha Vila Nova, segunda ne’e.
Lúcio esplika, prosesu pakotementu materiál sensitivu mak hanesan hanesan livru, buletin votu, karimbu no tinta. Enkuantu materiál la’ós-sensitivu kompostu hosi kaixote, akta rezultadu eleisaun, fomuláriu reklamasaun, pasta plástiku, fita no stop map.
Durante pakotementu STAE la rejista fallansu ruma maibé prosesu verifikasaun buletin votu sei hala’o iha sentru votasaun tanba iha-ne’ebá mak bainhira deteta estragu sei prienxe iha akta tanba karimbu sira sei utiliza iha fatin votasaun.
Maske nune’e, iha fiskál sira mak kestiona kona-ba totál buletin votu ne’ebé liu pursentu 10 maibé parte STAE konsege esplika razaun hanesan antesipa ba votante sira-ne’ebé mak sei vota iha kualkér sentru votasaun hanesan membru Polisía Nasionál Timor-Leste (PNTL), membru FALINTIL-FDTL no jornalista sira.
“Ha’u promete ba sira, ita transporta hosi Dili bulletin votu hamutuk 108.700 no sei to’o iha sentru votasaun, montante hanesan sei lori fali ba apuramentu nasionál,” Lúcio akresenta.
STAE Munisípiu Baucau husu ba fiskál sira atu kontinua fó informasaun ba malu no akompaña prosesu eleisaun atu nune’e hatene totál votante inklui buletin iha kada sentru votasaun to’o apuramentu munisípiu.
STAE hamutuk ho administrasaun munisípiu Baucau identifika viatura estadu nian hamutuk 35, aumentu ho STAE nian tolu, apoia tán hosi nasionál karreta 10 no aluga karreta 12 nune’e tótal hotu hamutuk viatura 50 hodi transporta materiál eleisaun ba kada sentru votasaun no estasaun votasaun.
Totál livru iha Baucau hamutuk 2.174 hosi buletin votu hamutuk 108.700, sei distribui ba sentru votasaun 125 no estasaun votu hamutuk 150 hosi tótal eleitór na’in-96.207.
Jornalista : Natalino Belo
Editór : Evaristo Soares Martins
