DILI (TATOLI) — Prezidenti Repúblika Eleitu, Dr. Francisco Guterres “Lú-Olo” hakarak governu foun mai ne´e governu ida forte nune´e bele lori dezenvolvimentu mai iha Timor-Leste.
“Prezidenti Repúblika presiza governu ida forte. Governu ida forte sei bele dudu prezidenti repúblika sai forte atu bele kontribui efetiva ba konstrusaun Estadu no Nasaun,” Lú-Olo hato´o deklarasaun ne´e iha sede Comoté Central FRETILIN, Comoro, Dili, foin lalais ne´e, liuhusi serimónia agradesementu ba partidu polítiku sira no povu tomak ne´ebé hili ona nia sai prezidenti repúblika periodu 2017-2022.
Nia esplika presiza governu ida forte para povu bele sente katak governu foun, prezidenti foun, parlamentu foun no tribunál foun introdus duni mudansa, serbisu duni ba povu no tau matan duni ba povu.
Lú-Olo informa katak iha eleisaun parlamentár mai ne´e, partidu apoiante ninia kandidatura sei la´o ketak. Tuir nia, biar la´o ket-ketak maibé tenki hanoin Nasaun no Estadu Repúblika Demokrátika Timor-Leste atu hametin demokrasia.
Iha biban ne´e, Prezidenti Repúblika Eleitu deklara katak nia sei promove diálogu kona-ba asuntu governasaun iha Nasaun ou Konseitu Nasionál Dezenvolvimentu.
“Prezidenti Repúblika sei buka nafatin promove diálogu. Diálogu entre instituisaun privadas ho públikus, diálogu entre família sira. Ita hatene katak ita nia sosiedade dalaruma padese mós ba iha buat barak. Oras ne´e dadauk, mundu ne´e oin seluk. Mundu ida ne´ebé besik liu ita Timor-Leste. Tanba ne´e, ita presiza prepara ita nia án no tenki hatene ita nia án para hamriik sai hosi ita nia uma laran ba hamriik iha odamatan hodi tama iha mundu ida globalizadu,” nia esklarese.
Eis gerileiru salienta luta la to´o de´it lori nia ba túr iha Aitarak-Laran, maibé luta tenki kontinua nafatin. Tenki buka espasu diálogu para nia (Lú-Olo) bele sai prezidenti ba povu tomak. Sé lae, Lú-Olo sei la sai prezidenti ba povu tomak.
Jornalista: Xisto Freitas / Editor: Gantry Meilana
