DILI, (TATOLI) – Peskizadór Mario Marçal no Eva Filomena de Fátima Freitas, konklui iha sira-nia peskiza kona-ba admisaun sidadaun timoroan sira iha Administrasaun Públika Timor-Leste katak Estadu presiza hadi’a iha jestaun administrasaun.
“Administrasaun públika presiza fokaliza iha primazia departamentu jestaun ema nian hodi asegura prosesu administrasaun (planeamentu, organizasaun, diresaun no kontrolu) liu-liu iha funsaun administrativa nasaun nian”, refere rezultadu peskiza, bolseiru Mario Marçal no Eva Filomena de Fátima, ba TATOLI husi Brazíl, ohin.
Peskizadór sira ne’e akresenta konkluzaun ida ne’e sira foti bazea ba análize dokumentál, liu-liu Estatutu Funsaun Públika no Dekretu lei Nº 34/2008 ne’ebé estabelese prosesu réjime konkursu públiku, rekrutamentu, selesaun no promosaun ba ema sira iha administrasaun públika kona-ba jestaun ema nian.
Sira mós rekomenda peskiza ne’ebé sira halo ona sei bele kontinua ba futuru atu diskute liután fatór sira ne’ebé mak relasionadu no motivu sira ne’ebé mak lori estadu Timor-Leste hodi adota tipu métodu ida ne’e.
“Rekomenda ba peskiza sira tuir mai hodi avalia no dialógu ho partisipante iha prosesu konkursu ne’ebé mak hala’o husi Administrasaun Públika hodi kontribui ba prosesu admisaun ema nian ne’ebé efisiente liután no produtividade hodi hadi’a jestaun ema nian iha Timor-Leste”, rekomenda bolseiru timoroan sira ba área Administrasaun Públika ne’e.
Entretantu, estudante Administrasaun Públika sira ne’e esplika mós katak administrasaun públika ne’e nu’udar organizasaun ida ne’ebé presiza moris no sobrevive.
Kresimentu ne’e bele engloba kompleksidade iha rekursu nesesáriu sira ba ninia operasionalizasaun atividade sira hanesan: rekursu materiál, finanseiru no prinsipalmente ema nu’udar fatór fundamentál ne’ebé ajuda iha dezenvolvimentu funsaun sira. Entrada ema nian posibilita organizasaun hodi dezempeña kargu nesesáriu ba progresu administrasaun públika hodi alkansa objetivu institusionál sira.
Jornalista: Rafy Belo
Editora: Rita Almeida
