DILI, 09 janeiru 2020 (TATOLI)-Ministériu Solidaridade Sosiál no Inkluzaun (MSSI) liuhosi ninia servisu tékniku sira, dadaun ne’e halo ona analiza ba esbosu lei kona-ba polítika nasionál inkluzaun ema ho defisiénsia ba periodu 2020-2024.
Iha tinan 2019 liubá, MSSI halo ona konsulta públika ho Autoridade Munisípiu 12, Rejiuan Autónomu Espesiál Oé-Cusse Ambeno (RAEOA).
Alende ne’e halo mós ho liña ministeriál hanesan Ministériu Justisa, Ministériu Edukasaun Juventude no Desportu, Ministériu Saúde, Ministériu Obrás Públikas, Ministériu Transporte no Komunikasaun, Sekretáriu Estadu Igualidade Inkluzaun no seluk tan.
Notísia Relevante:MSSI Konsulta Planu Asaun Nasionál ba Ema ho Defisiénsia
“Progresu konsultasaun ita termina ona iha tinan 2019 fulan-dezenbru liubá, agora ekipa tékniku sira konsentra hala’o analiza hodi dezenvolve esbosu ba planu asaun nasionál ne’e,” hateten, Diretór Nasionál Asisténsia Sosiál MSSI, Mateus da Silva ba Ajénsia TATOLI,iha Caicoli, Dili,ohin.
Nia dehan, depois tékniku sira finaliza ona prosesu analiza esbosu lei ne’e maka sei elabora sai relatóriu hodi aprezenta ba governu hodi deskute no aprova iha reuniaun konsellu ministru.
Notísia Relevante:MSSI ho MS Halo Konsultasaun Nível Ministeriál Ezbosu PAN Ba Ema Ho Defisiénsia
“Tinan ne’e nia laran, ita sei lori esbosu planu asaun nasionál ne’e ba konsellu ministru hodi bele fó apresiasaun,”tenik Diretór MSSI ne’e.
Polítika nasionál ba ema ho defisiénsia no inkluzaun ne’e importante atu tulun governu hodi fó asisténsia no protesaun di’ak ba sidadaun atu asesu iha área edukasaun, saúde, justisa, formasaun profisionál no empregu, transporte públiku, desportu no seluk tan.
Jornalista:Nelson de Sousa
Editór :Francisco Simões
