DILI, 20 novembru 2020 (TATOLI)—Asosiasaun Parteira Timor-Leste (APTL) kompromete atu redúz kazu mortalidade inan no oan iha Timor-Leste.
Prezidente APTL, Natalia de Araújo, hato’o kompromisu ne’e durante komemorasaun aniversáriu APTL nian ba dala 20 ho tema “Parseria entre parteira ho inan, oan, família no komunidade hodi garante kualidade servisu saúde maternu infántíl ne’ebé integradu iha kontestu pandemia Covid 19” ne’ebé hala’o iha salaun Katedral Villa-Verde Dili, sesta ne’e.
Notísia Relevante :APTL husu MS kria alojamentu ba parteira sira
Tuir dadus peskiza demográfiku 2016 kona-ba mortalidade inan iha 195/1000, mortalidade labarik menus husi tinan 5 mai kraik 41/1000, taxa mánutrisaun ba labarik 46%, kobertura imunizasaun kompletu 53%, partos asistidos 57%, partu iha fasilidade saúde 49%.
Nia dehan husi relatóriu peskiza demográfiku ne’e hatudu katak Timor-Leste hahú iha progresu ba dezenvolvimentu iha área saúde nian.
Tuir metas husi objetivu dezenvolvimentu sustentavél to’o 2030, Timor-Leste hakarak redúz kazu mortalidade maternal husi 195/1000 ba 70/1000, mortalidade labarik menus tinan 5 mai kraik 41/1000 tuun ba 25/1000.
Atu redúz númeru mortalidade inan no oan, APTL presiza hetan apoiu husi entidades hotu-hotu liliu Governu no Parlamentu Nasionál atu aprova orsamentu no polítika.
”Iha Timor-Leste totál parteira hamutuk 805 ne’ebé servisu iha fasilidade saúde Governu, postu saúde, sentru saúde komunitariu, ospitál referál sira no mós ospitál nasionál inklui klínika privada sira entaun nu’udar hala’o kna’ar parteira hotu-hotu dedika sira-nia servisu tomak hodi hadi’a kualidade moris inan, oan no saúde populasaun tomak iha área ida idak nian,” nia dehan.
Entretantu, partisipa iha serimonia komemorasaun aniversáriu APTL ba dala 20 ne’e maka Vise Primeiru-Ministru, Armanda Berta dos Santos, Ministra Saúde, Odete Maria Freitas Belo, no membru Asosiasaun Parteira Timor-Leste husi Munisípiu 12 inklui Rejiaun Administrativa Oe-Cusse Ambeno (RAEOA).
Notísia Relevante :APTL halo promosaun saúde ba komunidade Manleuana
Jornalista : Felicidade Ximenes
Editór :Agapito dos Santos
