DILI, 02 fevereiru 2021 (TATOLI)-Kandidatu partidu PATIFOR sei kompleta rekizitu balun ne’ebé Tribunál Rekursu (TR) husu iha tempu badak nia laran.
Liuhosi konferénsia imprensa, tersa ne’e, iha sede PATIFOR, Faról, Dili, prezidente interinu PATIFOR, Gregório Saldanha, hateten hafoin partidu nia ekipa halo verifikasaun no identifika fali dokumentu sira, ne’ebé uluk aprezenta ba Ministériu Justisa (MJ) liuhosi Diresaun Nasionál Servisu Rejistu Notariadu hodi halo inskrisaun ka rejistu atu sai nu’udar partidu polítiku, maibé ikus Tribunál Rekursu foti desizaun hodi indefere tanba ne’e PATIFOR buka kompleta tan rekizitu sira-ne’e.
Notísia Relevante : Patifor ho PDS mós la prienxe rekizitu
Mate-restu Masakre 12 Novembru 1991 ne’e, esplika hahú hosi inísiu kedas bainhira PATIFOR nu’udar kandidatu partidu polítiku hatama nia rekerimentu inskrisaun ho kartaun eleitorál hamutuk 33.025 ba MJ iha outubru 2020, atu sai nu’udar partidu polítiku foun nune’e sempre buka atu halo tuir rekizitu sira ne’ebé lei haruka.
“PATIFOR hahú hala’o nia prosesu rejistu ka inskrisaun liuhosi prosesu tirajen iha Notariadu Dili, durante fulan-tolu hahú hosi loron 5 outubru to’o loron 21 dezembru 2020, bainhira Diresaun Nasionál Servisu Rejistu no Notariadu iha Ministériu Justisa enkamiña dokumentu rejistu kandidatu Partidu Polítiku foun-hat inklui PATIFOR, ba iha Tribunál Rekursu,” Gregório Saldanha hateten.
Hafoin loron 15 ne’ebé monu iha loron 21 janeiru, tinan ne’e, Tribunál Rekursu hato’o notifikasaun hodi indefere PATIFOR, no husu atu foti fali kaixa dokumentu sira hotu hodi mai hadi’a no submete fali rejistu foun tuir lei haruka, tanba inskrisaun partidu la tuir prosedimentu administrativu ka la prienxe rekizitu tuir lei haruka. Ho nune’e, diresaun PATIFOR harii kedas ekipa verifikasaun ida hodi loke fali kaixa dokumentu rejistu nian, ne’ebé uluk submete ho orden ba MJ liuhosi servisu notariadu.
“Verifikasaun ne’e ho nia objetivu atu ordena fali dokumentu Kartaun eleitorál no formuláriu rejistu nian sira ne’ebé dezorden hotu iha Ministériu Justisa no Diresaun Nasionál Servisu Rejistu no Notariadu, hafoin simu fali kaixa dokumentu sira hosi Tribunal Rekursu,” Gregório Saldanha haktuir.
Nia dehan, PATIFOR sei tun fali ba baze hodi kompleta kartaun eleitorál ka formuláriu rejistu orijinál balu ne’ebé lakon, no la hetan legalizasaun hosi MJ liuhosi servisu notariadu hafoin simu fali kaixa dokumentu sira hosi Tribunál Rekursu.
Nia apela ba kuadru, militante PATIFOR nian iha rai-laran ka rai-li’ur, atu mantén kalma, no neon metin hodi fó apoiu nafatin ba estrutura interinu PATIFOR, hodi hadi’a dokumentu sira ne’ebé seidauk kompletu, atu nune’e, bele submete fali ba prosesu rejistu foun iha tempu badak.
“Partidu sei fó orientasaun ba maluk Koordenadór Rejional sira, no sira sei hatutan ba Koordenadór Munisipál no Delegadu sira hodi hala’o serbisu ida ne’e,” Gregorio Saldanha tenik.
Nia husu mós ba koordenadór Rejionál, Koordenadór Munisipál, no mós delegadu_ sira, hamutuk ho militante ka apoiante PATIFOR sira atu hametin unidade, servisu maka’as, hodi lao tuir de’it lei sira ne’ebé vigora iha Timor-Leste, nune’e maka bele alkansa objetivu hodi harii PATIFOR nu’udar Partidu Polítiku ida legal.
Jornalista : Nelson de Sousa
Editór : Francisco Simões
