DILI, 19 maiu 2021 (TATOLI)—Agência de Tecnologia da Informação e Comunicação, Institutu Públiku (TIC) TIMOR I.P asina nota entendimentu kooperasaun ho Komisaun Nasionál Timor-Leste ba UNESCO (KNTLU) hodi serbisu hamutuk iha área informátika.
Diretór Ezekutivu TIC Timor, I.P, Roberto Caitano de Sousa Vicente, hateten, nota entendimentu ne’e atu kobre apoiu báziku hanesan dezenvolvimentu portál, website hosting no email sira hodi fasilita serbisu KNTLU iha sistema informasaun.
“Ami hakarak hato’o apresiasaun boot ba komisaun Nasionál Timor-Leste ba UNESCO ba kolaborasaun ne’e, tanba hatudu konsiderasaun ba TIC liuhosi utilizasaun téknolojia, informasaun no komunikasaun ho di’ak liu, hodi utiliza meiu sira hanesan email, website no seluk tan,” Diretór Ezekutivu ne’e hateten hafoin asina akordu iha salaun Prezidénsia Konsellu Ministru, Palásiu Governu, kuarta ne’e.
Tuir nia, KNTLU nia papél importante tebes nune’e presiza envolve TIC Timor hanesan parseiru estratéjiku hodi implementa planu Governu eletróniku.
“Ita boot sira-nia partisipasaun ativa no esforsu bele kontribui haluan ajénsia nia servisu ba insitutisaun Estadu sira seluk no ba Governu jerál,” nia akresenta.
Nune’e, TIC,I.P sei garante servisu sira liuhosi akordu kooperasaun hodi bele la’o ho susesu no fó satizfasaun ba parte rua.
Iha biban hanesan, Sekretáriu Ezekutivu KNTLU, Francisco Barreto, agradese ba TIC Timor tanba ho laran luak atu apoia instala servisu informátiku.
“Ami agradese no kontinua kolabora hamutuk ho TIC Timor ba futuru hodi implementa polítika liga teknolojia informasaun no komunikasaun iha Timor-Leste,” nia dehan.
Nota entendimentu ne’e, asina hosi Diretór Ezekutivu TIC Timor, I.P, Roberto Caitano de Sousa Vicente no Sekretáriu Ezekutivu KNTLU, Francisco Barreto.
Iha biban hanesan, asina mós Service Level Agreement (SLA) ba website, ne’ebé reprezenta hosi Diretór Divizaun Aplikasaun TIC Timor, Justo Fernandes ho Koordenadór Komunikasaun no Informasaun KNTLU, Clementino Pinto Amaral.
Enkuantu, SLA ba email ofisiál asina hosi Diretór Divizaun Infraestrutura, André Felix Marques ho Koordenadór Komunikasaun no Informasaun KNTLU, Clementino Pinto Amaral.
Bazeia ba dekretu-lei númeru 29/ 2017, TIC Timor, I.P harii ho nia papél atu implementa polítika liga ba teknoloja, informasaun no komunikasaun hodi prepara teknolojia ótimu ne’ebé suporta ho aplikasaun, infraestrutura inklui polítika informátika bazeia ba prioridade nasionál.
VIII Governu Konstitusionál tau prioridade importante ba asuntu Governu eletróniku, nune’e TIC Timor kontinua serbisu ho instituisaun Estadu sira atu fó apoiu iha dominu Governu eletróniku tuir nesesidade no haree ba padraun sistema informátika atualizadu.
Daudaun ne’e, institutu públiku iha área informátika ne’e, apoiu ona instituisaun Estadu hamutuk 40-resin iha servisu informátika, ne’ebé hafoin halo entendimentu ne’e KNTLU mós hola parte hanesan parseiru TIC Timor iha área teknolojia.
Jornalista: Florêncio Miranda Ximenes
Editora: Julia Chatarina
