DILI, 01 Juñu 2026 (TATOLI) – Deputada husi Partidu Libertasaun Populár (PLP), Ermenegilda Laurentina, preokupa ho projetu reabilitasaun estrada husi Lautein bá Lospalos ne’ebé lansa ona fatuk dahuluk, maibé projetu konstrusaun seidauk hahú.
Nia lamenta tanba Governu halo ona lansamentu fatuk, iha Outubru tinan kotuk, no tuir prosesu aprovizionamentu legál katak depoizde lansa fó tempu fulan ida ba empreza manán-na’in atu mobiliza ekipamentu bá iha fatin referidu.
“Maibé realidade ami haree katak husi fim de Outubru to’o agora seidauk la’o. Hakarak Ministériu Obra Públika bele fó informasaun serbisu husi estrada Lautein bá Lospalos ne’e atinje ona pursentu hira?”, Ermenegilda Laurentina kestiona.
Hatán ba preokupasaun ne’e, Ministru Obra Públika, Samuel Marçal, esplika katak hafoin lansamentu, asina kontratu ho empreza manán-na’in no tuir lei depoizde asina kontratu tenke haruka ba tribunál durante fulan ida para hetan vistu. Depoizde hetan vistu, iha fulan tolu ba empreza halo mobilizasaun ba mákina pezada no buka fatin tau sira-nia akampamentu.
“Buat sira-ne’e hotu, fulan kotuk ha’u bá to’o iha ne’ebá haree katak sira foin mak halo clearing, hodi tau akampamentu. Programa sira ne’e hotu, sira komesa halo ona to’o faze ida ikus, bolu stakeout, ida-ne’e estrada nian luan, kloot, to’o iha ne’ebé, sira haree hotu ona”, Samuel Marçal informa.
Tuir nia, prosesu hotu ne’ebé kompañia halo la’o tuir hela hela kalendáriu ne’ebé aprovizionamentu ezije.
Iha loron 31 Outubru 2025, Primeiru-Ministru, Xanana Gusmão, no Ministru Obra Públika, Samuel Marçal, lansa fatuk dahuluk ba projetu reabilitasaun estrada nasionál husi munisípiu Lautein ba postu-administrativu Lospalos ho kilómetru 27.980.
Projetu reabilitasaun estrada ne’e implementa husi kompañia internasionál ChongQing durante tinan ida ho balun ho montante orsamentu $18.836.713,10.
Iha sorin seluk, deputada PLP Maria Angelina Sarmento mós husu ba MOP atu halo intervensaun lalais ba estrada kotu iha Afaloikai-Baguia, tanba iha semana kotuk ema hulan de’it pasiente hakat mota hodi asesu ba ambulánsia multifunsaun, tanba karreta para dook.
Hatán ba kestaun ne’e, ministru Samuel Marçal dehan kona-ba estrada iha kotu ne’e akontese mós iha fatin barak. “Ami-nia tékniku sira bá hala’o levantamentu. Buat ida ponte kotu ne’e, ha’u la’os dehan de’it ohin kotu aban bá halo ona, maibé ita presiza halo estudu, halo dezeñu didi’ak, depois mak ita bele halo ponte. Ha’u mós akompaña hela iha mídia sosial haree katak kestaun ne’e grave, no iha fatin seluk tan”, dehan.
Tanba ne’e, esforsu ne’ebé Governu halo mak buka alternativu hodi loke dalan ne’ebé komunidade bele utiliza temporariamente.
Notísia relevante: PM Xanana lansa fatuk dahuluk reabilita estrada Lautein bá Com
Jornalista: Arminda Fonseca
Editora: Maria Auxiliadora
