LAUTEIN, 30 Outubru 2025 (TATOLI)—Primeiru-Ministru, Kay Rala Xanana Gusmão, sesta ne’e, hamutuk ho Ministru Obra Públika, Samuel Marçal no entidade sira seluk halo lansamentu ba reabilitasaun estrada husi Munisipiu Lautein bá Suku Com, Postu Administrativu Lautein.
Notísia Relevante: Lansamentu konstrusaun estrada Lautein-Com no Lospalos hein PM fila husi Malázia
Projetu reabilitasaun estrada dirasaun ida-ne’e kuazé kilometru 19.760 no sei implementa husi Empreza Internasionál Shananxi Construction Engineering Group durante tinan ida ho balun ho montante $11,213,813.90.
Primeiru-Ministru, Kay Rala Xanana Gusmão, hateten loos duni asuntu infraestrutura ne’e permite mós iha ita-nia Planeamentu Estratéjiku Dezemvolvimentu Nasionál (PEDN) 2011 to’o 2030, ne’ebé define katak infraestrutura bázika mak sai hanesan baze ba dezenvolvimentu ne’ebé klasifika tiha ona estrada nasioná, rejionál, lokál no estrada rurál.
“Ohin, ha’u mai iha ne’e liuliu imi komunidade sira hodi asiste asinatura kontratu entre Governu ho kompañia atu hadi’a estrada ba komunidade, tanba iha fatin balun sempre iha indemnizasaun no lakohi fo fatin atu hadi’a Estrada,” Xefe Governu ne’e afirma iha ninia diskurus ba serimomia lansamentu primeira pedra ba reabilitasaun Estrada husi Lautein ba Suku Com, iha Ssuku Com, ohin.
Nia dehan, Governante sira mai hotu iha ne’e kontente tebes haree ferik sira barak iha ne’e tanba ho sira-nia terus mak ita hetan ukun-an.
“Problema atu dezenvolve ita-nia rai tenke iha vizaun ba rai ida-ne’e, liuliu joven sira atu buka aprende ho ida-ne’e tanba lakleur ami laiha imi mak sei kontinua,” nia dehan.
Ministru Obra Públika, Samuel Marçal, hateten iha okaziaun ida-ne’e nia hato’o agradesementu ba ekipa sira-ne’ebé servisu hamutuk hodi realiza obra ida-ne’e bele la’o.
“Kuazé ita hotu ninia servisu maka’as besik tinan ida to’o ohin loron projetu lubuk ida mak konklui durante tinan rua nia laran,” Ministru ne’e informa.
Nune’e, governante ne’e dehan, presiza ema hotu nia kolaborasaun di’ak atu obra ida-ne’e bele konklui tuir kontratu ne’ebé iha karik laiha impedimentu ruma, tanba osan ne’e povu nian entaun sira presiza asesu.
“Ita hotu-hotu mós iha direitu atu tau matan no fó apoiu atu labele iha impedimentu,” nia hateten.
Prezidente Autoridade Munisípiu Lospalos, Mélio de Jesus, hateten durante tinan barak nia laran komunidade munisípiu Lautein enfrenta difikuldade iha setór infraestrutura bázika hanesan Estrada iha Lospalos ba Lautein no Lautein ba Com.
“Maibe ohin loron marka loron signifikante iha istória dezenvolvimentu Lautein nian mak halo lansamentu ofisiál ba projetu reabilitasaun estrada dirasaun Lautein ba Com,” Prezidente autoridade ne’e informa.
Nune’e, nia dehan, lansamentu projetu ida ne’e nu’udar resposta konkretu ba preokupasaun no ezijénsia husi komunidadea, maibé agora di’ak ona ba sira atu halo movimentu hodi lori sira-nia produtu ba faan.
Xefe suku Com, sérgio J. Cristovão, hato’o agradesementu ba esforsu Governu nian hodi reabilita estrada ne’ebé kle’ur ona hahú iha tinan 1984 ona la hadi’a, maibé ohin loron bele hatuur fatuk dahuluk hodi implementa projetu ida-ne’e.
“Durante ne’e estrada sai preokupasaun mai ami atu halo movimentu, entaun ida-ne’e difikulta mós ami atu investe iha setór turizmu tanba dalan ladi’ak, turista sira mós ladun barak atu mai vizita,” líder komunitária ne’e hateten.
Maibe, nia apresia ho polítika Governu ida-ne’e bele ajuda ona sira atu kontinua investe setór turizmu no bainhira dalan ne’e konklui ona sira sei dezenvolve turizmu komunitária atu atrai nafatin vizitante sira.
“Tanba ne’e, komunidade no autoridade lokál sira koopera ho empreza hodi aselera lalais programa id- ne’e ba oin. Karik iha fallansu ruma iha terrenu presiza informa atu bele rezolve tuir kapasidade ne’ebé iha,” nia dehan.
Iha biban ne’e reprezentante komunidade Com, Januário da Cruz, sente kontente tebes ho polítika Governu nian ne’ebé bele hadi’a ona dalan ba sira hodi halo movimentu tanba durante ne’e sira sofre tebes ho kondisaun estrada.
“Ami kontente tebes tanba durante tempu naruk nia laran ami hein no agora mak foin atu hadi’a estrada ida-ne’e liuhusi, ohin, Primeiru-Ministru mai halo lansamentu fatuk dahuluk,” komunidade ne’e dehan.
Enkuantu iha atividade lansamentu ne’e partisipa husi entidade Governu, autoridade lokál, autoridade seguransa PNTL, parséria dezenvolvimentu no komunidade.
Jornalista : Alexandra da Costa
Editór : Cancio Ximenes
