Tatoli tenke sai ajénsia notisioza ne’ebé publika informasaun ho evidénsia no prova
DILI, 15 Jullu 2026 (TATOLI)-Prezidente Parlamentu Nasionál, Maria Fernanda Lay, husu ba Ajénsia Notisioza Timor-Leste Tatoli, I.P tenke sai ajénsia notisioza ne’ebé hato’o informasaun ho evidénsia no prova iha publikasaun informasaun sira.
Mensajen ida-ne’e hato’o iha ámbitu selebrasaun aniversáriu Tatoli ba da-10 (27 Jullu 2016-27 Jullu 2027).
“Ha’u espera katak bainhira ita-nia idade aumenta, ita-nia maturidade aumenta no hanesan jornalista, Tatoli [halo notísia] ne’ebé ema hotu lee, labele halo ema lakohi lee. Ne’ebé, ita-boot sira hakerek evidénsia ho prova para [notísia] sai labele julga ema iha públika”, nia hateten ba Tatoli, iha Parlamentu, ohin.
Líder másima órgaun soberania daruak ne’em mós dezafia Tatoli atu kontinua hato’o informasaun ho balansu, tanba ohin loron ema barak gosta liu asesu husi rede sosiál.
“Ema barak uza mídia sosiál, jornál ema la lee ona. Atu atrai, imi mak tenke iha maturidade hodi hato’o notísia ne’ebé iha balansu ba ita-nia sosiedade, ida-ne’e mak ha’u dezeja susesu ba ita-boot sira”, dehan.
Tatoli I.P nu’udár ajénsia ofisiál Estadu Timor-Leste nian. Ezisténsia Tatoli maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu Ministru no publika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Iha fulan-Marsu 2017, Konsellu- Ministru aprova ANTIL sai Tatoli, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese Tatoli mak atu sai fonte informasaun ofisiál Estadu Timor- Leste ne’ebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karaterístika; rapidéz no rigór, maibé labele ignora nia rigorozidade hanesan akurasia, independente, izenta, klareza no nafatin iha integridade no mós kredibilidade.
Notísia relevante: FCHM sujere Tatoli reforsa rekursu umanu hodi halo kobertura to’o área rurál
Jornalista: Nelson de Sousa
Editora: Maria Auxiliadora
