DÍLI, 14 Jullu 2026 (TATOLI) – Uma-kain 700 resin iha suku Madohi enfrenta problema falta bee-moos, tanba ne’e autoridade suku husu ba governu atu haree kestaun ne’e.
Xefe Suku Madohi, Bernardino de Cristo Pereira, informa katak autoridade suku submete ona proposta ba Bee Timor-Leste, Empreza Públika (BTL, E.P.) atu fornese bee-moos ba uma-kain hirak ne’e.
“Ami submete ona proposta ba BTL, maibé to’o agora seidauk iha resposta,” dehan Bernardino ba TATOLI, iha Aldeia Beto Tasi, tersa (14/07).
Nia dehan, durante ne’e, fornesimentu bee la estável hodi obriga komunidade balu tenke kuru bee husi viziñu sira. Enkuantu, balun seluk obriga sosa bee atu uza ba hemu, tein, fase roupa no nesesidade doméstika seluk.
Suku Madohi iha aldeia ualu mak hanesan Beto Leste, Beto Tasi, Naroman BT, Rosário, 7 Dezenbru no Terra Santa, Anin Fuik no Loro Matan BT.
Tuir Bernardino, husi aldeia hirak-ne’e, aldeia Anin Fuik no Loro Matan BT mak hasoru problema falta bee-moos ne’ebé grave liu.
“Bainhira bee la mai durante semana ida tomak, komunidade iha Anin Fuik no Aitarak Laran tenke buka dalan seluk hodi kuru bee iha uma viziñu sira atu bele kontinua uza ba nesesidade loroloron,” dehan nia.
Jornalista: Camilio de Sousa
Editór: Filomeno Martins
