DILI, 22 Outubru 2025 (TATOLI)-Prezidente Autoridade Munisípiu (PAM) Lautein, Mélio de Jesus, informa lansamentu fatuk dahuluk ba konstrusaun estrada Lautein bá Com no Lautein bá Lospalos sei realiza nafatin iha Outubru tinan ne’e.
Nia salienta katak ekipa Ministériu Obra Públika (MOP) hamutuk ho autoridade Lautein forma ona Komisaun Organizadora ba preparasaun ba lansamentu ne’e. “Tuir loloos lansa iha [loron] 24 fulan ne’e, maibé tanba Primeiru-Ministru [PM] Xanana Gusmão sei halo viajen bá Malázia partisipa eventu Timor-Leste sai ofisilamente membru ASEAN, entaun hein fila husi ne’ebá mai mak halo lansamentu”, Mélio de Jesus adianta ba Tatoli iha, Parlamentu Nasionál, ohin.
Nia dehan iha lansamentu ne’e sei hala’o iha fatin rua mak konstrusaun estrada husi Lautein bá Com ho distánsia kilómetru 19.760, ne’ebé sei konstrui husi empreza Shansi Construction Engineering Grup Corporation Limited, husi Xina, ho totál orsamentu $11.213.813,90.
Ba konstrusaun estrada husi Lautein bá Lospalos ho distánsia kilómetru 27.980, neʼebé sei responsabiliza husi Chongqing International Construction Corporation, husi Xina, ho totál orsamentu $18.836.713,10.
Iha sorin seluk, Ministru Obra Públika, Samuel Marçal, hateten nia parte lakohi promote barak, maibé hothotu hein tanba prosesu hotu la’o iha Komisaun Nasionál Aprovizionamentu no iha tempu badak sei halo lansamentu.
Notísia relevante: Inísiu Outubru, Governu sei lansa fatuk dahuluk ba Estrada Lautein, Com-Lospalos
Jornalista: Arminda Fonseca
Editora: Maria Auxiliadora
