Manán DIT 2-3, Coração hadi’a pontu iha tabele klasifikasaun Liga Timorense
DILI, 14 Jullu 2026 (TATOLI)—Klube Primeira Divizaun Coração FC manan DIT 3-2 iha nia jornada dahitu Liga Futeból Timorense hodi hadi’a hikas sira-nia pontu ne’ebé antes ne’e ameasadu atu degrada ba segunda divizaun.
Husi vitoria ne’e, lori Coração hetan pontu sia (9) no haksoit sai husi jona degradsaun ka liña mean. Enkuantu DIT nafatin mantein ho pontu neen (6) iha tabela klasifikasaun provizóriu.
Bainhira jogu hahú ekipa rua lansa kedan kontra-atake ba malu. DIT Futebol Clube mak loke uluk kontajen, tanba iha minutu 33 ne’e avansadu Kouda Affo Mah aproveita falla iha liña defeza Coração nian hodi marka golu dahuluk muda rezultadu ba 1-0.
Coração Futebol Clube la lakon fiar. Sira kontinua presiona no hetan golu empata iha minutu 44 liu husi Yohanes Jehaman bainhira nia konsege finaliza ho di’ak iha área penalidade. Maibé besik ba tempu hemu bee nian, DIT FC aumenta fali sira-nia vantajen no iha minutu 45+1, Jose dos Santos marka golu liuhusi bola aas hodi taka primeira parte ho vantajen 2-1 ba DIT.
Segunda Parte: Coração Fila-Fali
Tama ba segunda parte, Coração domina bola no buka maneira oioin atu empata. Presaun ne’e hetan rezultadu iha minutu 49 bainhira Jeka Monteiro marka golu hodi muda rezultadu ba 2-2.
DIT FC tenta fali responde ho jogu bola longu no bola aas, maibé defeza Coração metin no la fó espasu ba avansadu sira.
Jogu la’o iha minutu 90+2, Coração hetan golu vitória liuhusi Pascoal Fernandes, nia konsege marka golu ne’ebé lori festa ba Coração.
Coração hatudu jogu ho performe ne’ebé di’a tanba sira luta to’o minutu ikus ho emosaun no velosidade oinsá atu foti pontu tolu kompletu no to’o tempu jogu nian termina, vitoria hela ba Coração ho rezultadu 3-2.
Husi vitoria ne’e lori Coração FC ba rekolla pontu tolu importante hodi hadi’a sira-nia pozisaun iha klasifikasaun. Enkuantu DIT tenke servisu maka’as tanba lakon pontu hafoin lidera iha primeira parte.
Jornalista : Hortêncio Sanchez
Editór : Cancio Ximenes
