DILI, 13 Jullu 2026 (TATOLI)-Bankada parlamentár sira dezigna deputadu na’in-26 nu’udar membru Komisaun Permanente hodi hala’o knaar durante resesu fulan rua ne’ebé sei hahú iha 15 Jullu.
Prezidente Parlamentu Nasionál, Maria Fernanda Lay, husu ba bankada sira atu halo koordenasaun no komunikasaun ne’ebé di’ak bainhira iha impedimentu husi deputadu membru efetivu no suplente hodi bele asegura atividade.
Tuir lista, deputadu konstituisaun membru Komisaun Permanente no suplente husi bankada CNRT iha na’in-12, Partidu Demokrátiku rua, FRETILIN ualu, KHUNTO rua no PLP rua, ne’ebé sei hala’o knaar hodi garante funsionamentu parlamentár iha tempu resesu nia laran.
Períodu resesu Parlamentu Nasionál komesa iha 15 Jullu no sei tama fali iha 15 Setembru 2026, ne’ebé sei hahú ho sesaun solene.
Tuir Konstituisaun iha artigu 102 kona-ba Komisaun Permanente, sira sei halo serbisu nafatin iha períodu ne’ebé Parlamentu Nasionál para hela, iha intervalu ba sesaun no mós iha kazu seluk-seluk previstu iha Konstituisaun.
Kompete ba Komisaun Permanente mak akompaña serbisu sira Governu nian no mós administrasaun nian. Koordena serbisu sira komisaun nasionál nian, promove konvokasaun Parlamentu Nasionál, prepara no organiza Parlamentu Nasionál nia sesaun sira.
Aleinde ne’e, autoriza dezlokasaun Prezidente Repúblika iha rai-laran, dirije Parlamentu Nasionál nia relasaun ho Parlamentu no instituisaun análoga sira iha rai seluk no autoriza deklarasaun estadu serku nian no estadu emerjénsia nian.
Tuir Konstituisaun iha artigu 99, lejizlatura komprende sesaun lejizlativu lima no sesaun lejizlativu idaidak iha durasaun tinan ida nian. Períodu normál funsionamentu Parlamentu Nasionál, rejimentu mak define.
Iha rejimentu Parlamentu Nasionál iha artigu 45 (Sesaun lejizlativa), períodu normál funsionamentu Parlamentu nian hahú iha 15 setembru no remata iha 15 Jullu. Tanba ne’e, Parlamentu iha lejizlatura daneen ne’e kompleta ona sesaun lejizlativa dahuluk no sesaun datoluk sei ramata iha 15 Jullu.
Jornalista: Nelson de Sousa
Editora: Maria Auxiliadora
