VIQUEQUE, 14 juñu 2021 (TATOLI) – Pároku Nossa Señora do Rosario de Fatima Uatulari, Amu João Tamonob, husu Uatulari-oan sira ne’ebé maioria agrikultór atu badinas halai natar hodi hasae produsaun hare no bele troka produtu agríkola sira ho osan.
Notísia Relevante : Cesta Bázika motiva agrikultór-sira
“Baibain ha’u sempre fó motiva agrikultór-sira badinas halo to’os no natar tanba ninia rendimentu ne’ebé di’ak no hadi’a ekonomia familiár nian,” Amu João Tamonob, haktuir ba Agência Tatoli iha Uatulari, Viqueque, domingu (13/06).
Amu João hatutan, Uatulari rai-bokur no poténsia boot tebetebes, tanba ne’e abitante-sira tenke hatene aproveita halo to’os no natar atu bele prodús produtu ai-han hodi sustenta uma laran no fa’an ba merkadu atu hadi’a vida ekonomia.
“Agrikultór-sira tenke sakrifika an hodi servisu iha to’os no natar laran, ita hatene, vida agrikultór terus, maibé moris iha mundu sempre hasoru dezafiu oi-oin. Maibé, liuhusi ita-nia kolen sei fó rezultadu ne’ebé di’ak,” amu João hateten.
Jornalista : Vitorino Lopes da Costa
Editór : Francisco Simões
