DILI, 26 outubru 2021 (TATOLI)— Polisia Nasionál Timor-Leste (PNTL), liuhosi Komandu Polísia Tránzitu munsípiu Dili, rejista ema na’in-12 mate tanba kauza asidente tráfegu iha fulan janeiru to’o outubru tinan ne’e.
“Kazu asidente tráfegu ne’ebé halakon ema vida hamutuk 12. Nune’e ita espera to’o tama dezembru númeru óbitu labele aumenta,” Komadante Polísia Tránzitu Munisipiu Dili, Inspetór Polísia Domingos Gama, relata ba jornalista sira iha knaar fatin, Caicoli, tersa ne’e.
Iha tinan 2018, rejista kazu óbitu ba asidente nain-23, na’in-29 maka lakon vida iha 2019 no iha 2020, asidente tráfegu hamate mós ema nain-19.
PNTL mós indetifika ema hira ne’ebé mate ho kazu asidente tráfegu maioria joven ho idade 25 mai kraik ho 90% no idade avansadu 10% ne’ebé lori motórizada la uza kapasetie, lanu no laiha karta kondusaun.
“Atu prevene risku asidente tráfegu ne’e, ami sei la tolera sira ne’ebé lori motór la uza kapasete no laiha karta kondusaun,” Komandate Tránzitu ne’e akresenta.
Polísia Tránzitu mós kontinua asume nia resposabilidade atu mantein lei no orden no halo pasa revista ba trasporte públiku, motór no karreta liuliu verifika karta kondusaun, karta inspensaun no dokumentu transporte nian.
Komandu munisípiu Dili husu ba públiku liuliu motorista sira atu la’o tuir regra tránzitu no halo renovasaun dokumentu karreta no motór ne’ebé liu prazu.
Notísia Relevante: PNTL rejista asidente tráfegu 37 iha semana dahuluk
Jornalista : Natalino Costa
Editór : Florencio Miranda Ximenes
