DILI, 26 outubru 2021 (TATOLI)— Polisia Nasionál Timor-Leste (PNTL) liuhosi Komandu Polísia Tránzitu Munisípiu Dili sei halo pasa revista ka “check point” rigirozu ba transporte públiku iha loron finadu hodi prevene asidente tráfegu.
Kada Tinan-tinan, asidente tráfegu sa’e maka’as iha loron ferias matebian nian, tanba dezlokasaun boot hosi Dili ba munisípiu sira ho trasporte.
Tanba ne’e, Komadante Polísia Tranzitu Munisipiu Dili, Inspetór Polísia Domingos Gama,hateten, iha selebrasaun loron finadu sei halo pasa revista iha munisípiu Dili hahú hosi semana ne’e to’o 5 novembru.
“Ami prepara membru Polísia Trázitu na’in-85 hodi hala’o pasa revista rigirozu tebes ba iha kapitál Dili, durante loron bo’ot finadu,” Inspetór Polísia Domingos Gama ba jornalista sira iha Komandu PNTL munisípiu Dili, Caicoli, tersa ne’e.
Nia haktuir, durante loron ferias Polísia Tránzitu kontinua asume nia resposabilidade atu mantein lei no orden no halo pasa revista ba trasporte públiku, motór no karreta liuliu verfika karta kondusaun, karta inspensaun no dokumentu transporte nian.
Komandu munisípiu Dili husu ba públiku liuliu motorista sira atu la’o tuir regra tránzitu
“Ita apela ba motorista ne’ebé dokumentu karreta no motór liu prazu, tenke ba halo renovsaun tanba ami laiha tolerasia,” Komandante Polisia Trázitu ne’e apela.
Entertantu, Timoroan iha territóriu tomak sei selebra loron finadu ka matebian iha loron 2 novembru.
Notisia relevante: PNTL rejista asidente tráfegu 37 iha semana dahuluk
Jornalista : Natalino Costa
Editór : Florencio Miranda Ximenes
