DILI, 20 dezembru 2021 (TATOLI)–Ministériu Turizmu, Komérsiu no Indústria (MTKI), segunda ne’e, selebra kontratu ho juventude empreendedór selesionadu no elijível hamutuk na’in-29.
“Benefisiáriu sira sei hetan apoiu ekipamentu hosi MTKI, nune’e ohin selebra kontratu,” Diretór Nasionál Apoiu no Dezenvolvimentu Mikro Pekena no Media Empreza, Bernardino de Menezes, hateten liuhosi nota ne’ebé Agência TATOLI asesu, segunda ne’e.
Inisiativa ne’e realiza tanba MTKI liuhosi Diresaun Jerál Indústria no Diresaun Nasional Apoiu no Dezenvolvimentu Mikro Pekena no Media Empreza (DN-ADMPM) serbisu hamutuk ho Programa Nasaun Unida ba Dezenvolvimentu (PNUD), no Institutu Apoiu Dezenvolvimentu Emprezariál (IADE), hodi realiza kompetisaun negósiu inovativu 2021 ho tema ‘Haburas Empreedendimentu Inovativu ba Rekopersaun Ekonomia’.
Nia dehan, kompetisaun ne’e lansa ona iha loron 17 setembru 2021, ho objetivu atu enkoraja joven produtivu no kreativu sira ne’ebé ho ideia negósiu inovativu iha setór turizmu, komérsiu, indústria, agrikultura, peska, tekonolojia no inovasaun jestaun de lixu.
Notísia relevante: MTKI no parseiru lansa kompetisaun negósiu inovativu ba timor-oan kreativu
Nune’e, Diretór Bernardino de Menezes, kongratula joven inovadór ne’ebé sai hanesan benefisáriu ba kompetisaun nasionál inovativu.
Iha biban hanesan, Ministru Turizmu, Komérsiu no Indústria, José Lucas do Carmo da Silva, hateten, MTKI nafatin tau importánsia ba setór indústria, tanba setór ne’e bele hasa’e kresimentu no bele halo diversifikasaun ekonomia.
Nune’e, governante ne’e enkoraja joven empreendedór sira atu aproveita didi’ak oportunidade ne’ebé iha, ho responsabelidade, efetivu no efikás, nune’e bele sai bukae ida hodi dezenvolve negósiu sira ho rezilente no sustentável iha futuru.
“Importante atu imi esforsu alkansa imi-nia mehi atu sai emprezáriu ne’ebé iha responsabilidade no susessu iha moris. Fiar katak ida-ne’e la’ós oportunidade, maibé responsablidade ne’ebé imi ida-idak asume atu sai ezemplár,” nia dehan.
Tanba kresimentu emprezariál ne’ebé mak joven kria, sei kria empregu boot no garante ba kresimentu ekonómiku ne’ebé ho kualidade, inkluzivu no sustentável iha futuru.
Antes ne’e, Komisaun Nasional Inovativu lansa kompetisaun no simu aplikasaun hamutuk 290, ne’ebé kompostu hosi joven inovadór mane 74% no feto 26%.
Jornalista : Arminda Fonseca
Editora : Julia Chatarina
