DILI, 01 abríl 2022 (TATOLI)—Sekretáriu Jerál Partidu Demokrátiku (PD), António da Concecão ‘Kalohan’, hateten bazea ba enkontru Konsellu Superiór partidu iha loron 31 marsu 2022 ho estrutura ne’ebé mai hosi munisípiu hotu inklui Rejiaun Administrativu Espesiál Óe-Cusse Ambeno (RAEOA) deside fó apoiu ba kandidatu Prezidente Repúblika, José Ramos Horta, iha eleisaun prezidensiál segunda volta.
“Razaun PD fó apoiu tanba tuir preferénsia vizaun polítika hanesan mós kandidatu Mariano Assanami Sabino ho kandidatu José Ramos Horta ne’ebé indijita hosi partidu CNRT no preferénsia hanesan ho Prezidente CNRT, Xanana Gusmão ne’ebé iha kapasiadade diálogu, promove diálogu, repozisaun orden konstituisional. Nune’e deklara apoiu kandidatu José Ramos Horta iha eleisaun segunda volta,” Kalohan deklara liuhosi konferénsia imprensa iha sede PD, Colmera, Dili, sesta ne’e
Iha eleisaun prezidensiál primeiru volta, Kandidatu Prezidente Repúblika hosi PD, Mariano Assanami Sabino Lopes, hetan votu 47.334 (7,3%).
Nia hateten iha períodu kampaña estrutura PD sei tun direta hodi akompaña kandidatu Ramos Horta ho númeru sorteiu 1 hodi esplika pozisaun polítika refere no husu militante atu bele fó apoiu hodi lori vitória.
Iha fatin hanesan Prezidente PD, Mariano Assanami Sabino, agradese no apresia estrutura partidu, apoiante no movimentu oioin fó apoiu ba nia kandidatu iha eleisaun primeiru volta.
Nia Kontratula kandidadu na’in-rua José Ramos Horta ho Francisco Guterres Lú Olo hanesan mais votadu hodi hakat ba segundu volta.
Nune’e husu iha eleisaun segunda volta garante estabilidade iha periódu kampaña promove demokrásia katak ukun ne’e mai hosi povu.
Tuir ajenda iha sesta ne’e, Prezidente PD ho ekipa sei akonpaña kandidatu Horta ba iha Oé-Cusse hodi hala’o kampaña loron dahuluk iha 02 abríl 2022.
Notísia Relevante: TR anúnsia númeru sorteiu: Horta númeru 1 no Lú Olo 2
Jornalista : Nelson de Sousa
Editór : Cancio Ximenes
