BAUKAU, 03 Jullu 2026 (TATOLI)—Komisaun Nasionál Eleisaun (CNE-sigla portugeza) husu partidu polítiku sira atu estabelese no funsiona sede iha kada munisípiu hodi prepara an ba eleisaun tinan 2027.
Prezidente CNE, José Belo, esplika CNE órgaun eleisaun hamriik independente hodi hala’o kna’ar kontrola no monitoriza prosesu eleisaun sira iha Timor-Leste no konsidera eleisaun hotu-hotu ne’ebé realiza importante, tanba ne’e konsidera sede ba partidu polítiku sira importante tebes, nu’udár fatin viveiru líder ba partidu ida atu prepara ba eleisaun sira-ne’ebé sei realiza iha nasaun demokrátika.
“Partidu sira tenke investe, la’ós de’it iha asaun maibé Estadu apoiu orsamentu natoon ba partidu, tanba ne’e tenke iha sede iha munisipiu,” José Belo hateten bainhira hala’o vizita ba sede partidu polítiku sira-ne’ebé eziste iha Munisípiu Baukau, Sesta ne’e.
Belo relata, husi vizita iha Baukau atu haree kondisaun husi kada partidu polítiku sira relasiona ho preparasaun antes realiza eleisaun sira hanesan eleisaun prezidénsial, munisipál no eleisaun parlamentár.
Aleinde ne’e, tuir Belo, ezisténsia sede partidu sira iha nivel munisipál nu’udár afirmasaun no enkorajamentu ba partidu sira fihir nia lideransa partidu ida-ne’ebé pontensiál hanesan iha kapasidade sai lideransa ba partidu ida, tanba Timor-Leste iha nivel internasionál liuliu sai membru permanente ba ASEAN.
“Iha vizita ida-ne’e ita tenke prepara ho di’ak estabilidade sai fundasaun ida oinsá atu lori partidu koonkorre ho di’ak, responsabilidade no fihir ema ne’ebé loos,” Belo akresenta.
Iha fatin hanesan, Vise-Prezidente Partidu Demokrátiku (PD) Munisípiu Baukau, António José Lopes, apresia ho prezensa CNE iha sede partidu sira iha Baukau no rekoñese atuál sede PD iha Baukau seidauk permanente, tanba durante tinan naruk sei utiliza uma privadu sai sede provizória.
“Ami sei esforsu ba sede permanente nune’e hala’o atividade enkontru sira loroloron ba eleisaun munisipál. Ami prontu, tanba ami-nia estrutura to’o ona iha baze,” António Lopes hateten.
Entretantu, tuir dadus, totál partidu polítiku ne’ebé antes ne’e eziste iha Baukau hamutuk 17, kompostu partidu lima mak establese sede hanesan FRETILIN, PLP, PD, KHUNTO no CNRT, enkuantu restante seidauk iha sede.
Jornalista: Natalino Belo
Editór: Xisto Freitas da Piedade
