BAUCAU, 12 abríl 2022 (TATOLI) – Autoridade administrasaun munisipál Baucau, tersa ne’e, hamutuk ho parseiru dezenvolvimentu sira deskute programa prioridade no mapeamentu iha munisípiu Baucau.
Prezidente Autoridade Munisípiu Baucau, Olívio ‘Bou Lesa’ Freitas, hateten objetivu hosi reuniaun ne’e ho intensaun atu halo mapeamentu hamutuk kona-ba programa entre administrasaun munisípiu no NGO sira hodi evita dupla projetu iha baze tanba hosi observasaun iha baze parseiru dezenvolvimentu sira realiza projetu iha suku ida ho projetu hanesan.
Enkontru Administrasaun Munisípiu Baucau ho parseiru dezenvolvementu NGO internasional no lokal hodi haree ba programa prioridade no mapamento iha Munisipiu Baucau.
“Importante tebes, sira mai ajuda la husu buat ida, ita mak tenke nakloke atu sira mai tanba ne’e reuniaun ho NGO ha’u lakohi falta no delega, ha’u rasik partisipa atu hakarak hatene apoia saida mai munisípiu, liuliu ba povu tanba tinan 2022 ne’e kapitál dezenvolvimentu ba munisípiu laiha,” Prezidente Autoridade Munisipál Baucau ko’alia iha Vila Nova, tersa ne’e.
Bou Lesa konsidera bainhira fó prioridade ba parseiru dezenvolvimentu sira sei iha impaktu ba dezenvolvimentu liuliu iha área rurál.
Nune’e mós fahe planu estratéjiku hosi autoridade ba NGO sira nune’e sai baze informasaun hodi implementa projetu iha Baucau nune’e ajusta planu asaun anuál munisipál nian hodi implementa iha baze.
“Sira tenke apár saida mak planu munisípiu nian, saida mak sira bele halo, sé lae projetu ne’ebé tipu hanesan implementa iha fatin hanesan, ne’e ladún evetivu,” Bou Lesa akresenta.
Tinan ne’e, autoridade Baucau laiha ba fundu kapitál menór no dezenvolvimentu nune’e liuhosi akordu ho parseiru internasionál hanesan UN Women implementa projetu merkadu saudável no UNDP implementa projetu hanesan reabilitasaun irrigasaun.
Projetu lima hosi UNDP mak hanesan reabilitasaun estrada rurál iha suku Lavateri to’o aldeia Onor Tibalari, postu Baguia, kanál irrigasaun iha Fatulia, aldeia Bahawatu, postu Venilale, kanál irrigasaun Buluto, postu Vemase, konstrusaun kanál irrigasaun iha Butufalo, postu Laga no konstrusaun irrigasaun iha Caibada, postu Baucau Vila no Bahamori postu Venilale.
Diretór NGO lókal Sentru Dezenvolvimentu Komunitária (CDC,sigla portugés), Vicente Matos Belo, hateten liuhosi inkontru refere bele ajusta planu programa no implementasaun projetu ho autoridade lókal nune’e projetu bele implementa iha suku hotu no evita dupla projetu.
CDC kolaborasaun ho Sekretaria Estadu Formasaun Profesionál no Empregu (SEFOPE) Baucau kona-ba implementasaun programa formasaun profisionál iha área agrikultura no prepara joven sira hodi hasoru merkadu traballu.
“Enkontru ne’e importante tanba CDC bele hatene nia kontribusaun liuliu redús taxa dezempregu iha Baucau,” Vicente Belo hateten.
Autoridade munisipál rejista parseiru dezenvolvimentu tantu internasionál no lókal ne’ebé realiza atividade iha Baucau hanesan UNDP, UN Women, ILO, KOICA, Word vision Timor-Leste, TOMAK, CRS, GIZ, CDC, Caritas Dioseze, Cailalo, Kolega da Paz, Asosiasaun Unidade Feto Dezenvolvimentu (AUFD), Alfela, Uma Paz, Centro Feto Haburas Dezenvolventu (CFHD) no seluk tán.
Jornalista : Natalino Belo
Editór : Evaristo Soares Martins
