EKONOMIA, HEADLINE, IMAJEN, MUNISÍPIU, OÉ-CUSSE (RAEOA)

Progresu reabilitasaun estrada rurál hosi Bobokase – Kutete atinje 70%

Progresu reabilitasaun estrada rurál hosi Bobokase – Kutete atinje 70%

Progresu reabilitasaun estrada rurál hosi Bobokase ba Kutete atinje 70%. Imajen mídia ZEESM.

OÉ-CUSSE, 17 maiu 2022 (TATOLI) – Progresu ba projetu reabilitasaun estrada rurál hosi suku Bobokase liga ba bairru Kutete, aldeia Mahata, suku Costa, perténsia ba sub-rejiaun Pante Makasar iha Rejiaun Administrasaun Espesiál Oé-Cusse Ambeno (RAEOA) atinje ona 70%.

Prezidente Autoridade RAEOA, Arsénio Paixão Bano, garante estrada ne’e fasilita komunidade sira iha fatin izoladu Kutete bele asesu ba atividade ekonomia iha merkadu no fasilidade seluk, inklui ajuda estudante sira bele asesu ba eskola ho di’ak.

“Semana kotuk ha’u ho tékniku sira hosi infraestrura, ami halo ona fiskalizasaun, ita atu haree direita, nia progresu serbisu kompañia nian atu aselera lalais hosi fasilita ita-nia inan-aman sira iha fatin sira-ne’e, ne’ebé nia serbisu tomak agora atinje ona 70%, hela kilómetru lima de’it bele kompleta ona, entaun komunidade bele la’o di’ak ona,” Arsénio Bano, hateten iha Oé-Cusse, kuarte ne’e.

Nia solisita, empreza Lifau Indah Unip.Lda, tanba envolve direita komunidade hosi fatin ne’e sai traballadór ba projetu manutensaun ne’e, nune’e bele ajuda komunidade atu serbisu iha suku no aldeia rasik no hetan direitu, duké uza fali traballadór hosi suku seluk.

Xefe suku Costa, Aleixo Abi, orgullu tanba autoridade konstrui obra ne’e ba komunidade Costa iha fatin izoladu Kutete, hodi fasilita transporte públiku no privada hodi asesu to’o komunidade nia fatin.

“Ha’u agradese ba autoridade tanba tinan ne’e bele hadi’a ona estrada, tanba ha’u-nia komunidade barak hela iha foho Kutete bainhira tempu udan susar tebes atu ultrapasa, maibé tinan autoridade hahú hadi’a ona, entaun iha futuru komunidade sei laiha ona problema kona-ba estrada,” líder lokál ne’e orgullu.

Projetu manutensaun estrada rurál ne’e ezekuta hosi empreza lokál Lifau Indah Unip, Lda, ho valór kontratu hamutuk $2,623,959.80 prevee iha Orsamentu Jerál Estadu (OJE) 2021 nian.

Atu reabilita estrada rurál hosi suku Bobokase liga ba bairru Kutete, aldeia Mahata, suku Costa ho distánsia kilómetru 14, manutensaun estrada ne’e nia medida metru-lima, kompleta rezolve ho valeta, ponte boot ida no ponte ki’ik hamutuk 10 no moru kontensaun.

Jornalista   : Abílio Elo Nini
Editór         : Evaristo Soares Martins

iklan
iklan

Comments are closed.

iklan
error: Content is protected !!