OÉ-CUSSE, 23 maiu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEO), liuhosi Sekretariu Rejionál ba Asuntu Komérsiu no Indústria, realiza kompetisaun solu fokál ba labarik tinan 17 ba kraik, hodi mentaliza nu’udar preparasaun fini ba futuru Oé-Cusse nian.
Kompetisaun ne’e abertura diretamente hosi Adjunta Prezidente Autoridade, ba Asuntu Reforsu Institusionál, Leonia Monteiro, ba konkorente na’in-20 maioria labarik tinan 17 ba kraik.
“Kompetisaun solu fokál realiza tanba komemora loron restaurasaun independénsia 20 maiu ba dala XX, ba konkorente sira-ne’ebé tuir kompetisaun, hatudu alin sira iha talentu ba públiku, no alin balun la tuir kompetisaun tanba sira iha talentu seluk, ida-ne’e oportunidade di’ak atu mentaliza hodi prepara fini kantór lokál ba futuru RAEOA nian,” Leonia Monteiro ko’alia iha abertura ne’ebé realiza iha ámbitu bazar iha Palaban, Oé-Cusse.
Prezidente Komisaun Organizadora, Pedro da Cunha atuál Sekretáriu Riejionál Komérsiu no Indústria, informa, kompetisaun ne’e importante ba kantór lokál sira, hodi hatudu sira-nia talentu múzika ne’ebé iha, hodi komemora loron restaurasaun independÉnsia 20 Maiu tinan ne’e iha atividade feira produtu lokál.
Nia fó sai katak, hosi konkorente na’in-20 partisipa iha kompetisaun solu fokál iha bazar kalan ne’e, fahe ba kategoria rua, labarik tinan 17 tún ba kraik hamutuk na’in-11 no tinan 18 ba leten hamutuk na’in-sia.
“Objetivu hosi kompetisaun solu fokál ne’e, atu promove kantór sira, mai hosi lokál, ema Oé-Cusse oan, atu prepara no mentaliza sira hanesan fini ba futuru Oé-Cusse nian,” nia katak.
Promosaun feira produtu lokál ne’e realiza durante loron 10, hahú iha loron 15 sei termina iha 25 maiu, no ékipa juri ba kompetisaun solu fokál ne’e, mai hosi Sekretáriu Rejionál ba Asuntu Administrasaun Estatál, António Seran, hosi nivél Edukasaun Juventude no Desportu, Florindo da Conçeição no Anita Mau.
Jornalista : Abílio Elo Nini
Editór : Evaristo Soares Martins
