OÉ-CUSSE, 02 Juñu 2022 (TATOLI) – Komandu Polísia Nasionál Timor-Leste (PNTL) iha Rejiaun Administrativa Espesiál Oé-Cusse Ambeno (RAEOA), kinta ne’e realiza inpesaun jerál ba dokumentu transporte públiku no pribadu ba membru sira molok realiza pasa-revista iha públiku.
Komandante PNTL RAEOA, Superintendente Xefe, Mateus Mendes Assunção, esplika, prevensaun ne’e iha internál PNTL nian, molok halo asaun ba públiku, nune’e bele sai ba iha públiku tenke sai ezemplu no preparadu atu hala’o misaun lei no no orden Estadu tuir lei ne’ebé vigora ona kona-ba transporte nian.
“Ohin ami halo inspesaun ba karreta ho motorizada tantu privada no Estadu nian, PNTL hanesan implementadór ba lei, ne’ebé bainhira halo fiskalizasaun ba públiku nia mós tenke kompleta ninia dokumentu ho asesor transporte ne’ebé nia uza, PNTL tenke sai ezemplu ba públiku, tán ne’e molok halo asaun ba iha públiku, ami halo inspesaun iha interna lai”, Mateus Mendes Assunção informa ba jornalista sira iha Kuartél PNTL Oé-Cusse.
Nia informa, inspesaun interna ne’e, laiha toleránsia, membru ne’ebé laiha xapa-matríkula, dokumentu no asesor seluk, sei hapara iha komandu, bainhira kompleta dokumentu no kontribui administrasaun ba kofre Estadu mak foin entrega fali.
“Asaun ne’e mós sei implementa iha públiku, karik identifika sidadaun ruma la kompleta dokumentu no asesor transporte nian, ita sei foti ho sansaun no sei relata ba iha tribunál mak sei foti asaun,” nia akresenta.
Komandante PNTL iha rejiaun Oé-Cusse, apela ba komunidade iha territóriu Oé-Cusse, bainhira uza dalan públiku presiza kompleta dokumentu no asesór transporte nian, karik PNTL halo pasa-revista, identifika sidadaun balu kondisaun hirak-ne’e sei toma responsabilidade.
Tuir planu bainhira remata inspesaun interna ne’e sei kontinua halo pasa-revista kada loron iha territóriu Oé-Cusse, tanba daudaun ne’e komandu distritál aviza liuhosi karta sirkulár.
Jornalista : Abílio Elo Nini
Editór : Evaristo Soares Martins
