OÉ-CUSSE, 14 juñu 2022 (TATOLI) – Rezultadu finál ba produsaun plantasaun hare époka 2022 iha Rejiaun Administrasaun Espesiál Oé-Cusse Ambeno (RAEOA) hetan tonelada 10.904.
“Iha 2022 ita-nia rezultadu produsaun crop cutting ba plantasaun hare ne’e, tonelada 10.904 iha territóriu Oé-Cusse, ne’e ba área poténsia kultivasaun ektare 4.522, ho nia área kolleta ektare 4.443, envolve agrikultór sira hamutuk na’in-9.368, ” Sekretáriu Rejionál ba Asuntu Agrikultura, José Eta, hateten iha Oé-Cusse, tersa ne’e.
Nia informa, rezultadu produsaun époka 2022 sa’e kompara ho 2021 nian, tanba iha 2021 hetan de’it tonelada 8.319 ba área kultiva ektare 2.248 ho nia área kolleta ektare 2.248, hosi rezultadu produsaun tinan ne’e, seidauk responde nesesidade interna rejionál nian, maibé diresaun agrikultura rejionál, iha estoke natoon ba hodi uza ba konsumu komunidade nian.
“Atu responde komunidade ein-jerál iha Oé-Cusse seidauk bele, ne’e hatudu sei persiza-tán apoiu importasaun ba foos mai Oé-Cusse, tanba bazea totál populasaun iha Oé-Cusse por volta rihun 85-resin, rezultadu produsaun tonelada 10.904 ne’e seidauk responde nesesidade totál,” nia katak.
“Rezultadu ne’e époka primeiru 2022 nian, no balu sei kontinua kuda tán iha juñu nia laran, ne’ebé posibilidade halai dala-rua iha tinan ida, maibé la’ós área hotu-hotu, iha área sira-ne’ebé maka kobertura ba barrajen Tono mai kraik, ita haree bee sei sufisiente hela atu fornese ba dala-rua nian,” nia katak.
Jornalista : Abílio Elo Nini
Editór : Evaristo Soares Martins
