DILI, 07 jullu 2022 (TATOLI)—Sekretáriu Estadu Arte no Kultura (SEAK) liuhosi Dirasaun Nasionál Patrimóniu Kulturál (DNPC, sigla portugués), finaliza ona halo verifikasaun ba apoiu uma lisan iha territóriu nasionál no deside sei fó apoiu ba uma lisan 27 ne’ebé prenxe rekezitu.
Notísia Relevante: SEAK finaliza ona halo verifikasaun ba proposta uma lisan
“Primeira faze verifikasaun ramata ona. Hosi verifikasaun ne’e totál uma lisan hamutuk 59 mak verifika iha primeira faze. Hosi 123 proposta, verifika 59 proposta no hosi 59 proposta ne’e ami inkamiña ba ekipa juri. Maibé, bazea ba rezultadu verifikasaun iha kampu hatudu katak, iha de’it uma lisan 27 mak priénse kritériu atu apoia iha primeira faze,” Diretór Nasionál Patrimóniu Kulturál, Gil Paulino S. Oliveira, informa ba Agência Tatoli, iha nia knar fatin, Díli, kuarta ne’e.
Ia observasaun dahuluk proposta komunidade sira halo duni maibé sira-nia preparasaun materiál seidauk iha no sira seidauk rekolla hamutuk ho materiál sira ba konstrusaun, daruak mak uma lisan barak konstrui ona ho materiál modern no datoluk mak balun halo uma lisan maibé sira inaugura ona.
“Ikus mai ita avansa ho uma lisan 27 proposta atu ba apoiu, liu-liu ba munisípiu sira-ne’ebé iha 2021 ladún hetan apoiu barak. Entaun, iha momentu ne’ebá, iha munisípiu tolu mak kategória hetan apoiu barak, tuir estatistika hanesan Baucau, Ermera, Ainaro no sira seluk iha 2021 hetan de’it apoiu lima, haat, ida no balun laiha liu. Entaun, iha tinan ne’e, hosi 27 inklui mós uma lisan tolu hosi munisípiu Ataúro,” nia dehan.
Tanba, nia dehan, Ataúro sai ona hanesan munisípiu no sira mós hatama proposta mai no ba ona verifika, tama ona ba prosesu atu ba apoiu.
Hosi ne’e, iha faze dahuluk ekipa diskute proposta uma lisan hitu (7) mak hetan apoiu no hosi hitu ne’e ekipa fó ona aprovasaun no hasa’e ona ba Ministru Ensinu Supérior Siénsia no Kultura, Longuinhos dos Santos, aprova.
“Daudaun ne’e, ami kontaktu hela sira atu kompleta dokumentu liu-liu konta bankária ho sira-nia deklarasaun atu kontaktu sira mai asina kontratu iha tempu badak, iha fulan ne’e nia laran,” nia informa.
Uma lisan hitu (7) ne’ebé atu hetan apoiu ne’e, fora hosi munisípiu Ermera, Baucau, Ainaro no RAEOA, restu tama hotu ba apoiu.
Tuir nia, bainhira ekipa painel juri atu aprova proposta, sira halo diskusaun dala-rua, no iha diskusaun dahuluk uma lisan 59 nia proposta mak loos ona no hosi 59 proposta diskute hitu (7) mak loos entaun hitu (7) avansa uluk ona ne’eb’e hetan ona aprovasaun hosi ministru.
“Restu ne’e, ami pendente. Hosi ne’e, 21 proposta kompleta ona dokumentu entaun avansa tan 21 nia proposta hodi ba ekipa juri iha sesta ne’e halo diskusaun aprova tan. Entaun, iha faze daruak ekipa juri diskute ona, hosi diskusaun ne’e komisaun aprova 21 uma lisan atu ba apoiu iha fulan jullu ne’e,” nia dehan.
Agora daudaun komisaun prepara akta aprovasaun atu membru sira asina, depois enkamiña ba Prezidente Komisaun Aprova, nune’e ba Ministru fó aprovasaun finál entaun tama ona ba iha públikasaun.
“Molok atu apoiu mós, ami tenke anúnsia públiku iha jornál no televizaun katak uma lisan sira ne’e mak hetan apoiu. Se ita públika ba mak mosu impedimentu hosi jerasaun balun ne’ebé pertense ba uma lisan ne’e mak dehan labele, entaun proposta uma lisan ne’e labele prosesa ba apoiu, nia tenke pendent no avansa ho sira seluk,” nia hateten.
Kona-ba apoiu uma lisan fahe ba faze rua, nia akresenta, tanba ligadu ho reuniaun ba komisaun nia aprovasaun.
“Primeira faze, tanba dokumentu ne’ebé kompletu. Faze daruak, tanba komunidade sira iha inisiativa rasik lori fali dokumentu seluk mai hodi kompleta sira-nia proposta. Entaun, konfirma fali proposta ne’e kompletu, avansa nafatin ba komisaun atu bele hetan aprovasaun,” Diretór DNPC ne’e hateten.
Jornalista : Nelia Fernandes
Editór : Cancio Ximenes
