DILI, 03 Outubru 2025 (TATOLI)-Asosiasaun Jornalista Timor-Leste Press Union (TLPU), servisu hamutuk ho Sekretáriu Estadu Komunikasaun Sosiál (SECOMS-sigla portugués), sesta ne’e, realiza semináriu kona-ba haburas literásia dijitál hametin lia-loos ba autoridade, professór nomos estudante sira iha munisípiu Kovalima.
Sekretáriu Estadu Komunikasaun Sosiál ne’ebé maka reprezenta hosi Diretór Jerál, Flroindo da Costa, hateten semináriu ho tema haburas literásia dijitál iha Kovalima ne’e importante ba estudante sira atu oinsá uza mídia sosiál ho loloos.
“Ami haree faze adapta téknolojia ne’ebé dijitál nune’e alunu sira uza mídia sosiál hodi asesu informasaun ne’ebé maka fó impaktu pozitivu,” nia hateten ba jornalista sira iha Kovalima.
Tuir-nia estudante barak la uja mídia sosiál hodi aprende siénsia maibé uza hodi halimar facebook, tiktok no seluk tan ne’ebé konsidera la kontribui ba dezenvolve abilidade pesoál hodi kontribui ba dezenvolvimentu família, sosiedade no nasaun.
Nune’e, ho semináriu ne’e atu fó hanoin ba estudante sira atu bao in bele utiliza mídia sosiál ho responsabilidade hodi kontribui ba dezenvolvimentu Timor-Leste.
Iha fatin hanesan Prezidente Autoridade Munisípiu Kovalima, Miguel Armada Cardoso, hateten semináriu ne’e importante atu haburas litérasia dijitál hodi hametin lia-loos iha Timor-Leste.
“Realidade hatudu dala barak ita la uza lia-loos nune’e semináriu ne’e la’os ba joven-sira de’it bele mos ba autoridade sira funsionáriu bele uza sala mídia sosiál la tuir dalan tanba laiha informasaun nune’e uza sala mídia,”nia hateten.
Atu transforma mentalidade foinsa’e sira kona-ba uza mídia sosiál, tuir Prezidente Autoridade ne’e katak, presiza formasaun adekuadu no sensibilizasaun informasaun hosi instituisaun ne’ebé toma konta ba asuntu dijitálizasaun nune’e bele ajuda estudante sira atu uza mídia sosiál ho loloos.
Nune’e rekomenda ba SECOMS atu fasilita formasaun ba funsionáriu sira kona-ba utilizasaun mídia sosiál ho loloos.
“La’os fasilita formasaun ba joven maibé presiza formasaun mós ba funsionáriu sira iha munísipiu kona-bá oinsa atu uza mídia sosiál ho lo-loos tanba dala barak utiliza mídia sosiál la tuir dalan,” nia rekomenda.
Ikusliu, Prezidente Asosiasaun TLPU, Candido Alves, reforsa atividade semináriu ne’e oinsá atu fahe informasaun ba autoridade sira iha munisípiu, profesór, estudante no joven-sira hodi verifika informasaun ho loloos.
“Ita atu hametin lia-loos katak ema-hotu presiza halo verifikasaun ba faktus daudaun ne’e isu falsa barak maka espalla nune’e TLPU iha responsabilidade oinsá atu partilla koñesimentu ba autoridade ,profesór alunu no Joven-sira bele verifika informasaun ne’ebé maka iha,”Candido hateten.
Oradór importante sira ne’ebé maka aprezenta sira-ninia materia iha semináriu ne’e maihosi Sekretáriu Estadu Komunikasaun Sosiál ne’ebé reprezenta Diretór Jerál, Florindo da Costa ho tópiku kona-ba liu hosi mídia sosiál bele halo krítiku maibé ho responsabilidade.
Dosente UNTL, Miguel Gonçalves aprezenta matéria kona-ba impaktu utilizasaun mídia sosiál ba estudante sira. Raimundo Oki nu’udar Diretór Oe-kuse Post aprezenta matéria kona-ba buka faktu, diferénsia foto faktus no orijinál.
Nune’e mós oradór hosi provedór PDHJ, Marino Moniz aprezenta papél PDHJ kona-ba direitu umanu ne’ebé liga ho vítima hosi mídia sosiál. Prezidente TPLU, Candido Alves aprezenta matéria kona-ba Asosiasaun TLPU sai defensór no promove liberdade imprensa
No ikusliu maka Prezidente Konsellu Imprensa, António Cesar Moniz Mali, aprezenta kona-bá Haburas literásia dijitál hametin lia-loos iha Timor-Leste.
Entretantu, semináriu kona-ba haburas literásia dijitál hametin lia-loos iha Timor-Leste bae tapa tuirmai sei hala’o iha munisípiu Manufahi.
Jornalista:Celestina Teles
Editór:Florencio Miranda Ximenes
