OÉ-CUSSE, 08 jullu 2022 (TATOLI) – Asosiasaun Halibur Defisiénsia Matan Timor-Leste (AHDMTL), sesta ne’e ensera formasaun kona-bá letra braille ba ema ho defisiénsia matan atu redús númeru analfabetizasaun iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Formasaun ne’e fasilita hosi AHDMTL hetan apoia hosi UNDP liuhosi programa Covid-Rezilent Elections in Timor-Leste (CORE-TL), hodi fasilita formasau bázika durante semana rua ba ema ho defisiénsia matan sira mai hosi suku ualu iha sub-rejiaun Pante Makasar.
Jestór AHDMTL, Luciano Borges, esplika, formasaun ne’e atu fasilita defisiénsia sira oinsá bele asesu ba eleisaun no prosesu dezenvolvimentu, tanba iha Timor-Leste ema ho defisiénsia sira barak mak sei hela ho analfabetizasaun.
Tán ne’e liuhosi formasaun ne’e bele fasilita sira atu partisipa no aprende bainhira to’o eleisaun, bele ezerse sira-nia direitu nu’udar sidadaun Timoroan livre hosi diskriminasaun.
“Bainhira maluk sira iha ona koñesimentu lé no hakerek, sira mós bele asesu ba edukasaun formál, naun-formál no informál, ida-ne’e maka ita fasilíta formasaun durante semana rua ho formasaun bázika, nune’e lori maluk sira atu sai hosi analfabetu, diskriminasaun liuliu atu redús númeru analfabetu iha ita-nia rai doben ne’e,” Luciano Borges, ko’ali iha serimónia enseramentu ne’ebé hala’o iha sede suku Costa, sub-rejiaun Pante Makasar.
Sekretária Rejionál ba Asuntu Edukasaun Solidariedade Sosiál no Inkluzaun, Avelina da Costa, agradese ba AHDMTL, tanba formasaun maske hala’o semana rua de’it maibé ajuda ona atubele lé forma fraze no hakerek ho letra baille.
“Ita hahú ho forma lé ABC to’o Z, hafoin iha dalan ona atubele tama iha formasaun sira seluk, nune’e dalan nakloke ba alin sira-ne’ebé ho defisiénsia matan hodi bele asesu ba edukasaun, tanba Timor-Leste aplika edukasaun inkluzivu,” nia katak.
Jornalista : Abílio Elo Nini
Editór : Evaristo Soares Martins
